panw phailati hain wo ta-sar-e-daman kya kya

paañv phailātī haiñ vo tā-sar-e-dāmāñ kyā kyā

naaz karte haiñ mire chāk-e-garebāñ kyā kyā

yād-e-dandāñ meñ tumhāre jo hayā se royā

ashk ne muñh ko chhupāyā tah-e-dāmāñ kyā kyā

dāman-e-dasht meñ sau baar vatan se mujh ko

khīñch laa.ī kashish-e-ḳhār-e-bayābāñ kyā kyā

ġhuncha-e-dil se tah-e-ḳhanjar-e-burrāñ qātil

bū-e-gul ban ke nikal jā.eñge armāñ kyā kyā

lutf uThne nahīñ detā hai ham-āġhoshī kā

ho shab-e-vasl meñ ḳhauf-e-shab-e-hijrāñ kyā kyā

shādī-e-qatl se thā shauq-e-tabassum mujh ko

sūrat-e-zaḳhm tah-e-ḳhanjar-e-burrāñ kyā kyā

na khulā uqda-e-gesū-e-sanam vaa.e nasīb

dast-e-tadbīr thake ho ke pashemāñ kyā kyā

naaz se ḳhanjar-e-qātil kī tarah maqtal meñ

merī gardan se lipaTtā hai garebāñ kyā kyā

roz ghaT jaatā hai kuchh himmat-e-mumsik kī tarah

tang kartā hai mujhe gosha-e-zindāñ kyā kyā

koī dariyā inheñ kahtā hai koī bārish-e-abr

dhoke dete haiñ mire dīda-e-giryāñ kyā kyā

roza-dārān-e-mohabbat se hayā kartī hai

shām-e-gesū sifat-e-sub.h-e-ġharībāñ kyā kyā

sun ke kuchh merī pareshānī-e-taqdīr kā haal

ban ke bigḌī hai tirī zulf-e-pareshāñ kyā kyā

lab milā kar lab-e-ḳhanjar se tire o qātil

muskurāte haiñ shigāf-e-dil-e-nālāñ kyā kyā

pūchhte kyā ho 'shagufta' chaman-e-ālam meñ

kyā kahūñ maiñ ki hai be-rahmī-e-ḳhūbāñ kyā kyā

panw phailati hain wo ta-sar-e-daman kya kya

naz karte hain mere chaak-e-gareban kya kya

yaad-e-dandan mein tumhaare jo haya se roya

ashk ne munh ko chhupaya tah-e-daman kya kya

daman-e-dasht mein sau bar watan se mujh ko

khinch lai kashish-e-KHar-e-bayaban kya kya

ghuncha-e-dil se tah-e-KHanjar-e-burran qatil

bu-e-gul ban ke nikal jaenge arman kya kya

lutf uThne nahin deta hai ham-aghoshi ka

ho shab-e-wasl mein KHauf-e-shab-e-hijran kya kya

shadi-e-qatl se tha shauq-e-tabassum mujh ko

surat-e-zaKHm tah-e-KHanjar-e-burran kya kya

na khula uqda-e-gesu-e-sanam wae nasib

dast-e-tadbir thake ho ke pasheman kya kya

naz se KHanjar-e-qatil ki tarah maqtal mein

meri gardan se lipaTta hai gareban kya kya

roz ghaT jata hai kuchh himmat-e-mumsik ki tarah

tang karta hai mujhe gosha-e-zindan kya kya

koi dariya inhen kahta hai koi barish-e-abr

dhoke dete hain mere dida-e-giryan kya kya

roza-daran-e-mohabbat se haya karti hai

sham-e-gesu sifat-e-subh-e-ghariban kya kya

sun ke kuchh meri pareshani-e-taqdir ka haal

ban ke bigDi hai teri zulf-e-pareshan kya kya

lab mila kar lab-e-KHanjar se tere o qatil

muskuraate hain shigaf-e-dil-e-nalan kya kya

puchhte kya ho 'shagufta' chaman-e-alam mein

kya kahun main ki hai be-rahmi-e-KHuban kya kya