pate rahe ye faiz teri be-ruKHi se hum

paate rahe ye faiz tirī be-ruḳhī se ham

goyā ki duur hote rahe zindagī se ham

ġham dā.imī hai aur ḳhushī aarzī sī chiiz

is vāste qarīb nahīñ haiñ ḳhushī se ham

mahsūs tum se mil ke huā ham ko pahlī baar

haiñ ham-kanār aaj mujassam ḳhushī se ham

ik daur thā likhā thā mire dil pe terā naam

haiñ aaj terī bazm meñ ik ajnabī se ham

jalne se āshiyāñ ke charāġhāñ sā ho gayā

mahrūm ho chuke the na.ī raushnī se ham

hai zindagī kī shaam nahīñ ham-navā koī

har samt dekhte haiñ ajab bekasī se ham

taḳhrīb-e-kā.enāt hai insān-dushmanī

'sartāj' kah rahe haiñ ye har aadmī se ham

pate rahe ye faiz teri be-ruKHi se hum

goya ki dur hote rahe zindagi se hum

gham daimi hai aur KHushi aarzi si chiz

is waste qarib nahin hain KHushi se hum

mahsus tum se mil ke hua hum ko pahli bar

hain ham-kanar aaj mujassam KHushi se hum

ek daur tha likha tha mere dil pe tera nam

hain aaj teri bazm mein ek ajnabi se hum

jalne se aashiyan ke charaghan sa ho gaya

mahrum ho chuke the nai raushni se hum

hai zindagi ki sham nahin ham-nawa koi

har samt dekhte hain ajab bekasi se hum

taKHrib-e-kaenat hai insan-dushmani

'sartaj' kah rahe hain ye har aadmi se hum