paya maza ye humne apni nigah laDi ka

paayā mazā ye ham ne apnī nigah laḌī kā

jo dekhnā paḌā hai ġhussa ghaḌī ghaḌī kā

uqda to nāznīñ ke abrū kā ham ne kholā

ab kholnā hai us kī ḳhātir kī gul-jhaḌī kā

is rashk-e-mah ke aage kyā qadr hai parī kī

kab pahuñche husn us ko aisī girī-paḌī kā

is gul-badan ne hañs kar ik le ke shāḳh-e-nasrīñ

ham se kahā ki kiije kuchh vasf is chhaḌī kā

jab ham 'nazīr' bole ai jaañ ye vo chhaḌī hai

dil TūTtā hai jis par juuñ phuul pañkhuḌī kā

paya maza ye hum ne apni nigah laDi ka

jo dekhna paDa hai ghussa ghaDi ghaDi ka

uqda to naznin ke abru ka hum ne khola

ab kholna hai us ki KHatir ki gul-jhaDi ka

is rashk-e-mah ke aage kya qadr hai pari ki

kab pahunche husn us ko aisi giri-paDi ka

is gul-badan ne hans kar ek le ke shaKH-e-nasrin

hum se kaha ki kije kuchh wasf is chhaDi ka

jab hum 'nazir' bole ai jaan ye wo chhaDi hai

dil TuTta hai jis par jun phul pankhuDi ka