pachas salon mein do ek baras ka rishta tha

pachās sāloñ meñ do ik baras kā rishta thā

mirī vafā se tumhārī havas kā rishta thā

hamārā pyaar to thā chāñd aur chakore sā

tumhārā ishq hī gul se magas kā rishta thā

rah-e-hayāt kā maiñ aisā ik musāfir thā

ki jaise shahr kī saḌkoñ se bus kā rishta thā

sunā hai maiñ ne masājid ke un mināroñ se

manādiroñ ke in ūñche kalas kā rishta thā

taras rahe haiñ jo gulshan meñ āshiyānoñ ko

kal unhīñ murġh-e-chaman kā qafas se rishta thā

maiñ sochtā huuñ bhalā mere jasd-e-ḳhākī se

ai 'ashk' kyā mire tār-e-nafas kā rishta thā

pachas salon mein do ek baras ka rishta tha

meri wafa se tumhaari hawas ka rishta tha

hamara pyar to tha chand aur chakore sa

tumhaara ishq hi gul se magas ka rishta tha

rah-e-hayat ka main aisa ek musafir tha

ki jaise shahr ki saDkon se bus ka rishta tha

suna hai main ne masajid ke un minaron se

manadiron ke in unche kalas ka rishta tha

taras rahe hain jo gulshan mein aashiyanon ko

kal unhin murgh-e-chaman ka qafas se rishta tha

main sochta hun bhala mere jasd-e-KHaki se

ai 'ashk' kya mere tar-e-nafas ka rishta tha