paDa hua main kisi aaine ke ghar mein hun

paḌā huā maiñ kisī aa.ine ke ghar meñ huuñ

ye terā shahr hai yā ḳhvāb ke nagar meñ huuñ

uḌaa.e phirtī hai an-dekhe sāhiloñ kī havā

maiñ ek umr se ik be-karāñ safar meñ huuñ

tujhe ye vahm ki maiñ tujh se be-ta.alluq huuñ

mujhe ye dukh ki tire halqa-e-asar meñ huuñ

mirī talāsh meñ gardāñ haiñ tiir kirnoñ ke

chhupā huā maiñ ḳhunuk sāya-e-shajar meñ huuñ

maiñ terī samt bhī ā.ūñgā ma.arifat ko tirī

abhī to apne hī irfāñ kī rahguzar meñ huuñ

tirī uḌaan meñ shāmil hai tarbiyat merī

mujhe na bhuul ki maiñ tere bāl-o-par meñ huuñ

bulā rahā hai udhar mujh ko merā mustaqbil

ghirā huā maiñ idhar haal ke bhañvar meñ huuñ

rakhegī tujh ko mo.attar sadā mahak merī

rachā huā maiñ tire ghar ke bām-o-dar meñ huuñ

mirī parakh ko bhī ā.eñge jauharī 'betāb'

huuñ la.al-e-nāb magar shahr-e-kam-nazar meñ huuñ

paDa hua main kisi aaine ke ghar mein hun

ye tera shahr hai ya KHwab ke nagar mein hun

uDae phirti hai an-dekhe sahilon ki hawa

main ek umr se ek be-karan safar mein hun

tujhe ye wahm ki main tujh se be-talluq hun

mujhe ye dukh ki tere halqa-e-asar mein hun

meri talash mein gardan hain tir kirnon ke

chhupa hua main KHunuk saya-e-shajar mein hun

main teri samt bhi aaunga marifat ko teri

abhi to apne hi irfan ki rahguzar mein hun

teri uDan mein shamil hai tarbiyat meri

mujhe na bhul ki main tere baal-o-par mein hun

bula raha hai udhar mujh ko mera mustaqbil

ghira hua main idhar haal ke bhanwar mein hun

rakhegi tujh ko moattar sada mahak meri

racha hua main tere ghar ke baam-o-dar mein hun

meri parakh ko bhi aaenge jauhari 'betab'

hun lal-e-nab magar shahr-e-kam-nazar mein hun