pagDanDi lag rahi thi pahaDon ke darmiyan

pagDanDī lag rahī thī pahāḌoñ ke darmiyāñ

niklī huī thī maañg yuuñ bāloñ ke darmiyāñ

pahle takallufāt sabhī bartaraf hue

phir guftugū shurūa huī āñkhoñ ke darmiyāñ

hijr-o-firāq aur ye tanhā.ī maar de

vaqfa agar na din kā ho rātoñ ke darmiyāñ

siine pe haath kyā rakhā dhaḌkan sañbhal ga.ī

hichkī sī ek qaid thī sāñsoñ ke darmiyāñ

kam-baḳht sab ke sāmne le de na terā naam

maiñ ne zabān daab lī dāñtoñ ke darmiyāñ

qaa.em hai us ke dam se hī dam-ḳham anā ġhurūr

sar naam kī jo chiiz hai shānoñ ke darmiyāñ

pahle maiñ baat kar luuñ zarā ġham-shanās kī

terā bhī hogā tazkira sheroñ ke darmiyāñ

kamzor sī nahīf sī bulbul ke vāste

ghamsān kī laḌā.ī thī chīloñ ke darmiyāñ

sāda-dilī to dekhiye 'dānish-azīz' kī

ik ghar banā rahā hai makānoñ ke darmiyāñ

pagDanDi lag rahi thi pahaDon ke darmiyan

nikli hui thi mang yun baalon ke darmiyan

pahle takallufat sabhi bartaraf hue

phir guftugu shurua hui aankhon ke darmiyan

hijr-o-firaq aur ye tanhai mar de

waqfa agar na din ka ho raaton ke darmiyan

sine pe hath kya rakha dhaDkan sanbhal gai

hichki si ek qaid thi sanson ke darmiyan

kam-baKHt sab ke samne le de na tera nam

main ne zaban dab li danton ke darmiyan

qaem hai us ke dam se hi dam-KHam ana ghurur

sar nam ki jo chiz hai shanon ke darmiyan

pahle main baat kar lun zara gham-shanas ki

tera bhi hoga tazkira sheron ke darmiyan

kamzor si nahif si bulbul ke waste

ghamsan ki laDai thi chilon ke darmiyan

sada-dili to dekhiye 'danish-aziz' ki

ek ghar bana raha hai makanon ke darmiyan