pahle hi tai tha mera itna KHasara hona

pahle hī tai thā mirā itnā ḳhasārā honā

ziist kā merī binā tere guzārā honā

kaam mushkil nahīñ koī agar insāñ chāhe

haañ zarūrī hai mashiyyat kā ishāra honā

ye dalā.el haiñ du'āoñ ke asar ke yā phir

hai karishma koī maujoñ kā kinārā honā

vaj.h kaafī hai ye ik shaḳhs kī barbādī ko

nafs par us ke kisī lat kā ijārā honā

bārhā tere tavassul se huā hai sābit

'ishq ke khel meñ shabnam kā sharāra honā

chashm-e-rahmat kī navāzish se khulā hai ye raaz

ġhair-mumkin nahīñ zarre kā sitārā honā

ġham ke maare hue hālāt se haare hue log

tum ko mil jaa.eñ agar un kā sahārā honā

māhir-e-fan meñ sifat miltī hai ai 'nāz' faqat

itnā āsāñ nahīñ insāñ kā idāra honā

pahle hi tai tha mera itna KHasara hona

zist ka meri bina tere guzara hona

kaam mushkil nahin koi agar insan chahe

han zaruri hai mashiyyat ka ishaara hona

ye dalael hain du'aon ke asar ke ya phir

hai karishma koi maujon ka kinara hona

wajh kafi hai ye ek shaKHs ki barbaadi ko

nafs par us ke kisi lat ka ijara hona

barha tere tawassul se hua hai sabit

'ishq ke khel mein shabnam ka sharara hona

chashm-e-rahmat ki nawazish se khula hai ye raaz

ghair-mumkin nahin zarre ka sitara hona

gham ke mare hue haalat se haare hue log

tum ko mil jaen agar un ka sahaara hona

mahir-e-fan mein sifat milti hai ai 'naz' faqat

itna aasan nahin insan ka idara hona