pahle jo tha wahi hai haal miyan

pahle jo thā vahī hai haal miyāñ

ishq ko hai kahāñ zavāl miyāñ

ek dil hī nahīñ bahut kuchh hai

jis ke luTne kā hai malāl miyāñ

razm-gāh-e-hayāt meñ kyā kyā

kaam aa.ī hai ġham kī Dhaal miyāñ

aadmī vaqt kī jabīñ par hai

aaj sab se baḌā savāl miyāñ

dil halāk-e-ġham-e-zamāna huā

paḌ gayā aa.ine meñ baal miyāñ

qais-o-farhād se na do tashbīh

aap apnī huuñ maiñ misāl miyāñ

ik yahī raushnī-e-tab.a to hai

merī pūñjī mirī manāl miyāñ

is ġham-e-zīst ke talātum meñ

kyā firāq aur kyā visāl miyāñ

kab huā ham se be-kulāhoñ kā

kaj-kulāhoñ se ittisāl miyāñ

ham qalandar haiñ ham se mat uljho

aa gayā gar kahīñ jalāl miyāñ

sach hai 'jābir' kā dam ġhanīmat hai

ab kahāñ aise ḳhush-maqāl miyāñ

pahle jo tha wahi hai haal miyan

ishq ko hai kahan zawal miyan

ek dil hi nahin bahut kuchh hai

jis ke luTne ka hai malal miyan

razm-gah-e-hayat mein kya kya

kaam aai hai gham ki Dhaal miyan

aadmi waqt ki jabin par hai

aaj sab se baDa sawal miyan

dil halak-e-gham-e-zamana hua

paD gaya aaine mein baal miyan

qais-o-farhad se na do tashbih

aap apni hun main misal miyan

ek yahi raushni-e-taba to hai

meri punji meri manal miyan

is gham-e-zist ke talatum mein

kya firaq aur kya visal miyan

kab hua hum se be-kulahon ka

kaj-kulahon se ittisal miyan

hum qalandar hain hum se mat uljho

aa gaya gar kahin jalal miyan

sach hai 'jabir' ka dam ghanimat hai

ab kahan aise KHush-maqal miyan