pahle KHuddari dikha kar phans gae

pahle ḳhuddārī dikhā kar phañs ga.e

phir vafā-dārī nibhā kar phañs ga.e

tum ko to ma.alūm thā ulfat kā sach

tum bhalā kyuuñ dil lagā kar phañs ga.e

jo ziyāda qurbatoñ se the dukhī

vo sabhī se duur jā kar phañs ga.e

jhuuT bolā ḳhuub bolā aur phir

ḳhud se hī nazreñ milā kar phañs ga.e

ham añdherā kar ke hī raushan hue

aur hamīñ mash.al jalā kar phañs ga.e

koī mai-ḳhāna nahīñ is shahr meñ

ham yahāñ par ghar banā kar phañs ga.e

pahle KHuddari dikha kar phans gae

phir wafa-dari nibha kar phans gae

tum ko to malum tha ulfat ka sach

tum bhala kyun dil laga kar phans gae

jo ziyaada qurbaton se the dukhi

wo sabhi se dur ja kar phans gae

jhuT bola KHub bola aur phir

KHud se hi nazren mila kar phans gae

hum andhera kar ke hi raushan hue

aur hamin mashal jala kar phans gae

koi mai-KHana nahin is shahr mein

hum yahan par ghar bana kar phans gae