pahle-pahal laDenge tamasKHur uDaenge

pahle-pahal laḌeñge tamasḳhur uḌā.eñge

jab ishq dekh leñge to sar par biThā.eñge

tū to phir apnī jaan hai terā to zikr kyā

ham tere dostoñ ke bhī naḳhre uThā.eñge

'ġhālib' ne ishq ko jo dimāġhī ḳhalal kahā

chhoḌeñ ye ramz aap nahīñ jaan pā.eñge

parkheñge ek ek ko le kar tumhārā naam

dushman hai kaun dost hai pahchān jā.eñge

qibla kabhī to tāza-suḳhan bhī kareñ atā

ye chār-pāñch ġhazleñ hī kab tak sunā.eñge

aage to aane dījiye rasta to chhoḌiye

ham kaun haiñ ye sāmne aa kar batā.eñge

ye ehtimām aur kisī ke liye nahīñ

ta.ane tumhāre naam ke ham par hī ā.eñge

pahle-pahal laDenge tamasKHur uDaenge

jab ishq dekh lenge to sar par biThaenge

tu to phir apni jaan hai tera to zikr kya

hum tere doston ke bhi naKHre uThaenge

'ghaalib' ne ishq ko jo dimaghi KHalal kaha

chhoDen ye ramz aap nahin jaan paenge

parkhenge ek ek ko le kar tumhaara nam

dushman hai kaun dost hai pahchan jaenge

qibla kabhi to taza-suKHan bhi karen ata

ye chaar-panch ghazlen hi kab tak sunaenge

aage to aane dijiye rasta to chhoDiye

hum kaun hain ye samne aa kar bataenge

ye ehtimam aur kisi ke liye nahin

tane tumhaare nam ke hum par hi aaenge