pahle to apne aapko tujh sa kare koi

pahle to apne aap ko tujh sā kare koī

phir mujh se dostī kā irāda kare koī

harkat dil-o-dimāġh meñ paidā kare koī

jo qaum mar chukī use zinda kare koī

sūraj ke saath saath badaltī haiñ apnā ruḳh

parchhā.iyoñ pe kaise bharosā kare koī

ḳhushbū kī tarh bikhrā huā hai fazāoñ meñ

kaise tire vajūd ko yakjā kare koī

ye bulb ye charāġh mire kaam ke nahīñ

kamre meñ muskurā ke ujālā kare koī

dil kā mu'āmla to hai dil kā mu'āmla

kab tak ḳhud apne aap se jhagḌā kare koī

buniyād hī khisakne lage jab makān kī

dīvār-o-dar pe kaise bharosā kare koī

mujh ḳhāksār kā bhalā aisā kahāñ nasīb

do chaar din jo merī tamanna kare koī

ai 'chāñd' ye 'ajūba to hone se ab rahā

aa kar hameñ sameTe ikaTThā kare koī

pahle to apne aap ko tujh sa kare koi

phir mujh se dosti ka irada kare koi

harkat dil-o-dimagh mein paida kare koi

jo qaum mar chuki use zinda kare koi

suraj ke sath sath badalti hain apna ruKH

parchhaiyon pe kaise bharosa kare koi

KHushbu ki tarh bikhra hua hai fazaon mein

kaise tere wajud ko yakja kare koi

ye bulb ye charagh mere kaam ke nahin

kamre mein muskura ke ujala kare koi

dil ka mu'amla to hai dil ka mu'amla

kab tak KHud apne aap se jhagDa kare koi

buniyaad hi khisakne lage jab makan ki

diwar-o-dar pe kaise bharosa kare koi

mujh KHaksar ka bhala aisa kahan nasib

do chaar din jo meri tamanna kare koi

ai 'chand' ye 'ajuba to hone se ab raha

aa kar hamein sameTe ikaTTha kare koi