pahle to KHwab zehn mein tashkil ho gaya

pahle to ḳhvāb zehn meñ tashkīl ho gayā

phir sail-e-vaqt meñ kahīñ tahlīl ho gayā

be-nūr rāstoñ meñ jo bhaTke hue the log

jugnū bhī un ke vāste qindīl ho gayā

kankar malāmatoñ ke girātā hai misl-e-sañg

mujh meñ koī parind abābīl ho gayā

vaqt-e-tulūa aayā gahan āftāb par

din chaḌh rahā thā raat meñ tabdīl ho gayā

thā jis ġhanī ke paas ḳhazīna-e-ilm-o-fan

vo 'ahd-e-nau ke haath meñ zambīl ho gayā

apne gharoñ ke kar diye āñgan lahū lahū

har shaḳhs mere shahr kā qābīl ho gayā

lauh-e-jabīñ pe vaqt ne vo harf likh diye

chehra ġham-e-hayāt kī tafsīl ho gayā

sad shukr 'soz' mere ḳhayālāt ke liye

merā qalam vasīla-e-tarsīl ho gayā

pahle to KHwab zehn mein tashkil ho gaya

phir sail-e-waqt mein kahin tahlil ho gaya

be-nur raston mein jo bhaTke hue the log

jugnu bhi un ke waste qindil ho gaya

kankar malamaton ke giraata hai misl-e-sang

mujh mein koi parind ababil ho gaya

waqt-e-tulua aaya gahan aaftab par

din chaDh raha tha raat mein tabdil ho gaya

tha jis ghani ke pas KHazina-e-ilm-o-fan

wo 'ahd-e-nau ke hath mein zambil ho gaya

apne gharon ke kar diye aangan lahu lahu

har shaKHs mere shahr ka qabil ho gaya

lauh-e-jabin pe waqt ne wo harf likh diye

chehra gham-e-hayat ki tafsil ho gaya

sad shukr 'soz' mere KHayalat ke liye

mera qalam wasila-e-tarsil ho gaya