pahli kiran ke war se pahle ki baat thi

pahlī kiran ke vaar se pahle kī baat thī

dukh sub.h-e-zar-nigār se pahle kī baat thī

āñkheñ bachī kahāñ haiñ ki ye log dekh paa.eñ

bīnā.ī is ġhubār se pahle kī baat thī

har samt maiñ huuñ aur mere hone kī hai ḳhabar

duniyā visāl-e-yār se pahle kī baat thī

sun lafz-e-intizār hai aslan sadā-e-kun

tanhā.ī intizār se pahle kī baat thī

ham hī the apnā rog bhī apnā ilaaj bhī

ye ishq ke ḳhumār se pahle kī baat thī

duniyā thī ham pe bojh ki duniyā pe bojh ham

ye baat dil pe baar se pahle kī baat thī

kohna udāsiyoñ meñ khile qahqahe the ham

ye dukh ke regzār se pahle kī baat thī

pahli kiran ke war se pahle ki baat thi

dukh subh-e-zar-nigar se pahle ki baat thi

aankhen bachi kahan hain ki ye log dekh paen

binai is ghubar se pahle ki baat thi

har samt main hun aur mere hone ki hai KHabar

duniya visal-e-yar se pahle ki baat thi

sun lafz-e-intizar hai aslan sada-e-kun

tanhai intizar se pahle ki baat thi

hum hi the apna rog bhi apna ilaj bhi

ye ishq ke KHumar se pahle ki baat thi

duniya thi hum pe bojh ki duniya pe bojh hum

ye baat dil pe bar se pahle ki baat thi

kohna udasiyon mein khile qahqahe the hum

ye dukh ke regzar se pahle ki baat thi