pahlu mein dil hai dard ki duniya kahen jise

pahlū meñ dil hai dard kī duniyā kaheñ jise

par is qadar ujaaḌ ki sahrā kaheñ jise

vo ro.ab-e-husn thā ki ban aa.ī na ham se baat

yuuñ hāl-e-dil kahā ki na kahnā kaheñ jise

āñkhoñ se dekhne ko to ab bhī haiñ dekhte

thī aur chiiz zauq-e-tamāshā kaheñ jise

mānind-e-māh us kā falak par dimāġh ho

jhūToñ bhī tāb-e-husn meñ tum sā kaheñ jise

sab aap ke taġhāful-o-jaur-o-jafā bajā

hai ek apnā shikva ki be-jā kaheñ jise

zauq-e-suḳhan ke din bhī the shāyad vahī ki jab

dil meñ kasak thī dard-e-tamannā kaheñ jise

'mahrūm' shā.iroñ meñ bahut nāmvar nahīñ

itnā zarūr hai ki sab achchhā kaheñ jise

pahlu mein dil hai dard ki duniya kahen jise

par is qadar ujaD ki sahra kahen jise

wo roab-e-husn tha ki ban aai na hum se baat

yun haal-e-dil kaha ki na kahna kahen jise

aankhon se dekhne ko to ab bhi hain dekhte

thi aur chiz zauq-e-tamasha kahen jise

manind-e-mah us ka falak par dimagh ho

jhuTon bhi tab-e-husn mein tum sa kahen jise

sab aap ke taghaful-o-jaur-o-jafa baja

hai ek apna shikwa ki be-ja kahen jise

zauq-e-suKHan ke din bhi the shayad wahi ki jab

dil mein kasak thi dard-e-tamanna kahen jise

'mahrum' shairon mein bahut namwar nahin

itna zarur hai ki sab achchha kahen jise