pahuncha hai aaj qais ka yan silsila mujhe

pahuñchā hai aaj qais kā yaañ silsila mujhe

jañgal kī raas kyuuñ na ho āb-o-havā mujhe

aanā agar tirā nahīñ hotā hai mere ghar

daulat-sarā meñ apne hī ik din bulā mujhe

vo hove aur maiñ huuñ aur ik kunj-e-āfiyat

is se ziyāda chāhiye phir aur kyā mujhe

paidā kiyā hai jab se ki maiñ rabt-e-ishq se

begāna jāntā hai har ek āshnā mujhe

kāfir butoñ kī raah na jā aa ḳhudā ko maan

pīr-e-ḳhirad ne garche kahā bār-hā mujhe

par kyā karūñ ki dil hī nahīñ iḳhtiyār meñ

us ḳhānumā-ḳharāb ne aajiz kiyā mujhe

pahle hī apne dil ko na denā thā us ke haath

'īmān' ab to koī paḌī hai vafā mujhe

pahuncha hai aaj qais ka yan silsila mujhe

jangal ki ras kyun na ho aab-o-hawa mujhe

aana agar tera nahin hota hai mere ghar

daulat-sara mein apne hi ek din bula mujhe

wo howe aur main hun aur ek kunj-e-afiyat

is se ziyaada chahiye phir aur kya mujhe

paida kiya hai jab se ki main rabt-e-ishq se

begana jaanta hai har ek aashna mujhe

kafir buton ki rah na ja aa KHuda ko man

pir-e-KHirad ne garche kaha bar-ha mujhe

par kya karun ki dil hi nahin iKHtiyar mein

us KHanuma-KHarab ne aajiz kiya mujhe

pahle hi apne dil ko na dena tha us ke hath

'iman' ab to koi paDi hai wafa mujhe