pahunche jo manzil-e-maqsud pe pakke nikle

pahuñche jo manzil-e-maqsūd pe pakke nikle

rah ga.e vo jo tirī raah meñ kachche nikle

dekh kar mujh ko 'adū bazm se phūTe nikle

jin ko mīThā maiñ samajhtā rahā kaḌve nikle

bhiiḌ meñ ab ġham-e-duniyā ke phañsā huuñ maiñ bhī

maiñ bhī niklūñgā koī aur to sarke nikle

nā-ḳhudā ne to phañsā dī thī bhañvar meñ kashtī

naam jab ham ne ḳhudā kā liyā kaise nikle

ye milā mujh ko mirī dasht-navardī kā sila

muddatoñ baa'd mire paañv se kāñTe nikle

phir vo jaate haiñ bahut duur kisī aur taraf

tere 'āshiq vo jo but-ḳhāne se nikle nikle

tauba karte rahe piite bhī rahe haath ke haath

bāda-kash sāqiyā maiḳhāne ke surte nikle

sab se aage the jo kal uf re taġhayyur ki vahī

aaj duniyā kī har ik dauḌ meñ pīchhe nikle

nuqs 'ārif' thā parakh meñ ki haqīqat thī yahī

jis qadar sikke khare dekhe the khoTe nikle

pahunche jo manzil-e-maqsud pe pakke nikle

rah gae wo jo teri rah mein kachche nikle

dekh kar mujh ko 'adu bazm se phuTe nikle

jin ko miTha main samajhta raha kaDwe nikle

bhiD mein ab gham-e-duniya ke phansa hun main bhi

main bhi niklunga koi aur to sarke nikle

na-KHuda ne to phansa di thi bhanwar mein kashti

nam jab hum ne KHuda ka liya kaise nikle

ye mila mujh ko meri dasht-nawardi ka sila

muddaton ba'd mere panw se kanTe nikle

phir wo jate hain bahut dur kisi aur taraf

tere 'ashiq wo jo but-KHane se nikle nikle

tauba karte rahe pite bhi rahe hath ke hath

baada-kash saqiya maiKHane ke surte nikle

sab se aage the jo kal uf re taghayyur ki wahi

aaj duniya ki har ek dauD mein pichhe nikle

nuqs 'arif' tha parakh mein ki haqiqat thi yahi

jis qadar sikke khare dekhe the khoTe nikle