paikan jigar-pasand hai KHanjar gulu-pasand

paikāñ jigar-pasand hai ḳhanjar gulū-pasand

qātil mujhe qubūl kare jis ko tū pasand

paikāñ ko zahr hī meñ bujhā le vo but kahīñ

hogā na tauf-e-kā'ba-e-dil be-vuzū pasand

pīr-e-muġhāñ ko DhūñDh liyā ḳhizr mil ga.e

hai mere mudda.ā ko mirī justujū pasand

kahte haiñ arz-e-vasl-o-tamannā-e-qatl par

ye aarzū pasand na vo aarzū pasand

yā-rab girāñ ho qīmat-e-dil-hā-e-āshiqāñ

yā kauḌiyoñ ke mol bike chār-sū pasand

thā ḳhud-pasandiyoñ pe mujhe naaz kis liye

maiñ tujh ko nā-pasand rahā mujh ko tū pasand

tere gale kā haar rahe kaash dast-e-shauq

mazmūn-e-vasl ko hai bayāz-e-gulū pasand

zāhid ye apnī apnī pasand apnī apnī aañkh

zarf-e-vazū tujhe mujhe jām-o-subū pasand

paikāñ pe jo jigar ho mujhe vo jigar qubūl

mizhgāñ pe jo lahū ho mujhe vo lahū pasand

ābādī-e-harīm-e-dil-o-jāñ hai jis kī yaad

vo ḳhūb-rū pasand hai vo ḳhush-gulū pasand

ye shukr kā maqām hai ye faḳhr kī jagah

'rāsiḳh' se ḳhud-pasand ko aaya hai tū pasand

paikan jigar-pasand hai KHanjar gulu-pasand

qatil mujhe qubul kare jis ko tu pasand

paikan ko zahr hi mein bujha le wo but kahin

hoga na tauf-e-ka'ba-e-dil be-wuzu pasand

pir-e-mughan ko DhunDh liya KHizr mil gae

hai mere muddaa ko meri justuju pasand

kahte hain arz-e-wasl-o-tamanna-e-qatl par

ye aarzu pasand na wo aarzu pasand

ya-rab giran ho qimat-e-dil-ha-e-ashiqan

ya kauDiyon ke mol bike chaar-su pasand

tha KHud-pasandiyon pe mujhe naz kis liye

main tujh ko na-pasand raha mujh ko tu pasand

tere gale ka haar rahe kash dast-e-shauq

mazmun-e-wasl ko hai bayaz-e-gulu pasand

zahid ye apni apni pasand apni apni aankh

zarf-e-wazu tujhe mujhe jam-o-subu pasand

paikan pe jo jigar ho mujhe wo jigar qubul

mizhgan pe jo lahu ho mujhe wo lahu pasand

aabaadi-e-harim-e-dil-o-jaan hai jis ki yaad

wo KHub-ru pasand hai wo KHush-gulu pasand

ye shukr ka maqam hai ye faKHr ki jagah

'rasiKH' se KHud-pasand ko aaya hai tu pasand