paikar-e-KHaki ye mana maut se do-chaar hai

paikar-e-ḳhākī ye maanā maut se do-chār hai

zindagī terā magar rasta bahut dushvār hai

jo hai muflis vo zamāne meñ zalīl-o-ḳhvār hai

māl-o-zar ho paas jis ke sāhab-e-kirdār hai

ris rahā hai ḳhuuñ badan se bhīgtā hai pairahan

zaḳhm hai mere jigar kā yā ki lāla-zār hai

ḳhūn-e-dil se maiñ ne sīñchā hai tujhe ai zindagī

mere hī dam se to ye chehrā tirā gulzār hai

bhaap ban kar uḌ gayā merī rag-e-jāñ se lahū

bārisheñ ab ḳhuun kī hoñgī yahī āsār hai

jaane kis kī justujū ye kar rahe haiñ roz-o-shab

chāñd sūraj ke liye ik manzil-e-dushvār hai

bik rahe haiñ dīn-o-īmāñ bik rahe haiñ jism-o-jāñ

ye jahān-e-ārzū ik misr kā bāzār hai

aap ke dil kā muamma zehn ne hal kar liyā

aap ke inkār hī meñ aap kā iqrār hai

munfarid merī zabāñ hai ḳhūb-tar merā bayāñ

fikr kā 'tauqīr' ik dariyā pas-e-dīvār hai

paikar-e-KHaki ye mana maut se do-chaar hai

zindagi tera magar rasta bahut dushwar hai

jo hai muflis wo zamane mein zalil-o-KHwar hai

mal-o-zar ho pas jis ke sahab-e-kirdar hai

ris raha hai KHun badan se bhigta hai pairahan

zaKHm hai mere jigar ka ya ki lala-zar hai

KHun-e-dil se main ne sincha hai tujhe ai zindagi

mere hi dam se to ye chehra tera gulzar hai

bhap ban kar uD gaya meri rag-e-jaan se lahu

barishen ab KHun ki hongi yahi aasar hai

jaane kis ki justuju ye kar rahe hain roz-o-shab

chand suraj ke liye ek manzil-e-dushwar hai

bik rahe hain din-o-iman bik rahe hain jism-o-jaan

ye jahan-e-arzu ek misr ka bazar hai

aap ke dil ka muamma zehn ne hal kar liya

aap ke inkar hi mein aap ka iqrar hai

munfarid meri zaban hai KHub-tar mera bayan

fikr ka 'tauqir' ek dariya pas-e-diwar hai