paikar-e-mehr-o-wafa ruh-e-ghazal yani tu

paikar-e-mehr-o-vafā rūh-e-ġhazal yā'nī tū

mil gayā 'ishq ko ik husn-e-mahal yā'nī tū

shahr-e-ḳhūbāñ meñ kahāñ sahl thā dil par qaabū

muztarib dil ko milā sabr kā phal yā'nī tū

ġham-e-dil ho ġham-e-jānāñ ki ġham-e-daurāñ ho

sab masā.il kā mire ek hī hal yā'nī tū

DhūñD kar lā.ūñ koī tujh sā kahāñ se āḳhir

ek hī shaḳhs hai bas terā badal yā'nī tū

pyaas kī zad meñ mohabbat kā shajar yā'nī maiñ

jis pe barsā na kabhī priit kā jal yā'nī tū

qalb-e-'rāġhib' meñ 'ajab shaan se hai jalva-fagan

dilrubā.ī kā hasīñ tāj-mahal yā'nī tū

paikar-e-mehr-o-wafa ruh-e-ghazal ya'ni tu

mil gaya 'ishq ko ek husn-e-mahal ya'ni tu

shahr-e-KHuban mein kahan sahl tha dil par qabu

muztarib dil ko mila sabr ka phal ya'ni tu

gham-e-dil ho gham-e-jaanan ki gham-e-dauran ho

sab masail ka mere ek hi hal ya'ni tu

DhunD kar laun koi tujh sa kahan se aaKHir

ek hi shaKHs hai bas tera badal ya'ni tu

pyas ki zad mein mohabbat ka shajar ya'ni main

jis pe barsa na kabhi prit ka jal ya'ni tu

qalb-e-'raghib' mein 'ajab shan se hai jalwa-fagan

dilrubai ka hasin taj-mahal ya'ni tu