paiman-e-wafa toD ke jaane ke liye aa

paimān-e-vafā toḌ ke jaane ke liye aa

aa dil kī lagī aur baḌhāne ke liye aa

pāmāl hī kar zulm hī Dhāne ke liye aa

mujh ko mirā ehsās dilāne ke liye aa

nau-ḳhez bahāroñ se mire dil ko sajā de

zaḳhmoñ ke na.e phuul khilāne ke liye aa

kab se ġham-e-hālāt kī rāhoñ meñ paḌā huuñ

tū bhī koī Thokar hī lagāne ke liye aa

phūloñ kā taqāzā to nahīñ dast-e-karam se

kāñTe mirī rāhoñ meñ bichhāne ke liye aa

ho tanz kī bārish bhī tavajjoh kī adā se

ai abr-e-karam aag lagāne ke liye aa

ab ḳhud ko bhulā.ūñ ki tujhe yaad karūñ maiñ

ai hāsil-e-ġham itnā batāne ke liye aa

likkhā hai mirā naam tire dil ke varq par

maiñ harf-e-ġhalat huuñ to miTāne ke liye aa

har zaḳhm dil-e-'badr' ko ik taaza ḳhalish de

lau bujhte charāġhoñ kī baḌhāne ke liye aa

paiman-e-wafa toD ke jaane ke liye aa

aa dil ki lagi aur baDhane ke liye aa

pamal hi kar zulm hi Dhane ke liye aa

mujh ko mera ehsas dilane ke liye aa

nau-KHez bahaaron se mere dil ko saja de

zaKHmon ke nae phul khilane ke liye aa

kab se gham-e-haalat ki rahon mein paDa hun

tu bhi koi Thokar hi lagane ke liye aa

phulon ka taqaza to nahin dast-e-karam se

kanTe meri rahon mein bichhane ke liye aa

ho tanz ki barish bhi tawajjoh ki ada se

ai abr-e-karam aag lagane ke liye aa

ab KHud ko bhulaun ki tujhe yaad karun main

ai hasil-e-gham itna batane ke liye aa

likkha hai mera nam tere dil ke warq par

main harf-e-ghalat hun to miTane ke liye aa

har zaKHm dil-e-'badr' ko ek taza KHalish de

lau bujhte charaghon ki baDhane ke liye aa