pal pal meri KHwahish ko phir angez kiye jae

pal pal mirī ḳhvāhish ko phir añgez kiye jaa.e

mujh ko vo mire zarf meñ labrez kiye jaa.e

ye kaun hai jo aag sī dahkā.e lahū meñ

andar se mirī pyaas ko chañgez kiye jaa.e

saudā hai koī sar meñ to phir TūTegī zanjīr

dīvāna abhī raqs-e-junūñ tez kiye jaa.e

goyā mirī ḳhushbū ko vo pahchān gayā hai

achchhā hai ki mujh se abhī parhez kiye jaa.e

paa.e na mirī gard-e-safar bhī ye zamāna

raftār bahut hai jo vo mahmez kiye jaa.e

rakkhe yūñhī shādāb mujhe kisht-e-ġhazal meñ

mausam tirā miTTī mirī zarḳhez kiye jaa.e

pal pal meri KHwahish ko phir angez kiye jae

mujh ko wo mere zarf mein labrez kiye jae

ye kaun hai jo aag si dahkae lahu mein

andar se meri pyas ko changez kiye jae

sauda hai koi sar mein to phir TuTegi zanjir

diwana abhi raqs-e-junun tez kiye jae

goya meri KHushbu ko wo pahchan gaya hai

achchha hai ki mujh se abhi parhez kiye jae

pae na meri gard-e-safar bhi ye zamana

raftar bahut hai jo wo mahmez kiye jae

rakkhe yunhi shadab mujhe kisht-e-ghazal mein

mausam tera miTTi meri zarKHez kiye jae