palaT kar dekhne ka mujh mein yara hi nahin tha

palaT kar dekhne kā mujh meñ yaarā hī nahīñ thā

nahīñ aisā ki phir us ne pukārā hī nahīñ thā

samundar kī har ik shai par hamārī dastaras thī

ki tuġhyānī bhī apnī thī kināra hī nahīñ thā

vo ik lamha sazā kaaTī ga.ī thī jis kī ḳhātir

vo lamha to abhī ham ne guzāra hī nahīñ thā

vo ban kar chāñd tab utrā thā is dil kī zamīñ par

mohabbat kā jab āñkhoñ meñ sitāra hī nahīñ thā

varā-e-jism thā kuchh aur bhī us ke jilau meñ

faqat vo raushnī kā isti.āra hī nahīñ thā

junūñ ke paañv meñ chhan kaisī dar aa.ī ki maiñ ne

abhī vahshat ko sahrā meñ utārā hī nahīñ thā

palaT kar dekhne ka mujh mein yara hi nahin tha

nahin aisa ki phir us ne pukara hi nahin tha

samundar ki har ek shai par hamari dastaras thi

ki tughyani bhi apni thi kinara hi nahin tha

wo ek lamha saza kaTi gai thi jis ki KHatir

wo lamha to abhi hum ne guzara hi nahin tha

wo ban kar chand tab utra tha is dil ki zamin par

mohabbat ka jab aankhon mein sitara hi nahin tha

wara-e-jism tha kuchh aur bhi us ke jilau mein

faqat wo raushni ka istiara hi nahin tha

junun ke panw mein chhan kaisi dar aai ki main ne

abhi wahshat ko sahra mein utara hi nahin tha