palaT ke dida-e-hairan bhi nahin laya

palaT ke dīda-e-hairān bhī nahīñ laayā

maiñ apne saath ye pahchān bhī nahīñ laayā

safar meñ raḳht-e-safar se bhī bojh baḌhtā hai

isī liye to maiñ sāmān bhī nahīñ laayā

kahīñ badal na gayā ho samundaroñ kā mizāj

mah-e-tamām to haijān bhī nahīñ laayā

kisī tarah nahīñ lagtā mire qabīle kā

jo shaḳhs ḳhvāb meñ imkān bhī nahīñ laayā

ta.alluqāt meñ kuchh haiñ abhī nasheb-o-farāz

magar maiñ zehn meñ kuchh Thaan bhī nahīñ laayā

ajab sarāb-zada thā ufuq meñ Dūbtā chāñd

kisī ke chehre pe muskān bhī nahīñ laayā

bikhar gayā sar-e-sahrā 'kafīl' aur maiñ dekh

sukūt-e-dasht meñ tūfān bhī nahīñ laayā

palaT ke dida-e-hairan bhi nahin laya

main apne sath ye pahchan bhi nahin laya

safar mein raKHt-e-safar se bhi bojh baDhta hai

isi liye to main saman bhi nahin laya

kahin badal na gaya ho samundaron ka mizaj

mah-e-tamam to haijaan bhi nahin laya

kisi tarah nahin lagta mere qabile ka

jo shaKHs KHwab mein imkan bhi nahin laya

talluqat mein kuchh hain abhi nasheb-o-faraaz

magar main zehn mein kuchh Than bhi nahin laya

ajab sarab-zada tha ufuq mein Dubta chand

kisi ke chehre pe muskan bhi nahin laya

bikhar gaya sar-e-sahra 'kafil' aur main dekh

sukut-e-dasht mein tufan bhi nahin laya