palkon se aasman ko ishaara karo kabhi

palkoñ se āsmāñ ko ishāra karo kabhī

aañsū hamāre ġham kā sitāra karo kabhī

mausam javāñ huā hai bahāroñ ke nuur se

hāthoñ meñ haath Daale nazāra karo kabhī

tanhā.iyoñ kī rātoñ meñ ab ham se sharm kyā

malbūs ḳhāmushī kā utārā karo kabhī

dahlīz par khaḌe yuuñ sar-e-rāh-e-raftagāñ

apnā bhī intizār gavārā karo kabhī

dil shai ajiib hai kahīñ ham lauT hī na jaa.eñ

is ehtiyāt se na pukārā karo kabhī

ye jaañ tumārī nazr hai chāhe to jaan lo

ye dil tumhārā ghar hai sañvārā karo kabhī

palkon se aasman ko ishaara karo kabhi

aansu hamare gham ka sitara karo kabhi

mausam jawan hua hai bahaaron ke nur se

hathon mein hath Dale nazara karo kabhi

tanhaiyon ki raaton mein ab hum se sharm kya

malbus KHamushi ka utara karo kabhi

dahliz par khaDe yun sar-e-rah-e-raftagan

apna bhi intizar gawara karo kabhi

dil shai ajib hai kahin hum lauT hi na jaen

is ehtiyat se na pukara karo kabhi

ye jaan tumari nazr hai chahe to jaan lo

ye dil tumhaara ghar hai sanwara karo kabhi