palkon tak aa ke ashk ka sailab rah gaya

palkoñ tak aa ke ashk kā sailāb rah gayā

dariyā darūn-e-halqa-e-girdāb rah gayā

ye kaun hai ki jis ko ubhāre hue hai mauj

vo shaḳhs kaun thā jo tah-e-āb rah gayā

naḳhl-e-anā meñ zor-e-numū kis ġhazab kā thā

ye peḌ to ḳhizāñ meñ bhī shādāb rah gayā

kyā shahr par khulī hī nahīñ āyat-e-ḳhulūs

kyā ek maiñ hī vāqif-e-ādāb rah gayā

kuchh zikr-e-yār jis meñ thā kuchh zikr-e-vasl-e-yār

tadvīn-e-zindagī meñ vahī baab rah gayā

jo shai yahāñ kī thī vo yahīñ chhoḌ dī magar

āñkhoñ ke biich ek tirā ḳhvāb rah gayā

dekhā jo phir se jānib-e-dariyā ravāñ mujhe

bal khā ke apne aap meñ girdāb rah gayā

'anjum' tirī zamīn abhī kitnī duur hai

kosoñ-pare to qariya-e-mahtāb rah gayā

palkon tak aa ke ashk ka sailab rah gaya

dariya darun-e-halqa-e-girdab rah gaya

ye kaun hai ki jis ko ubhaare hue hai mauj

wo shaKHs kaun tha jo tah-e-ab rah gaya

naKHl-e-ana mein zor-e-numu kis ghazab ka tha

ye peD to KHizan mein bhi shadab rah gaya

kya shahr par khuli hi nahin aayat-e-KHulus

kya ek main hi waqif-e-adab rah gaya

kuchh zikr-e-yar jis mein tha kuchh zikr-e-wasl-e-yar

tadwin-e-zindagi mein wahi bab rah gaya

jo shai yahan ki thi wo yahin chhoD di magar

aankhon ke bich ek tera KHwab rah gaya

dekha jo phir se jaanib-e-dariya rawan mujhe

bal kha ke apne aap mein girdab rah gaya

'anjum' teri zamin abhi kitni dur hai

koson-pare to qariya-e-mahtab rah gaya