parda-e-ruKH kya uTha har-su ujale ho gae

parda-e-ruḳh kyā uThā har-sū ujāle ho ga.e

sab añdhere dāman-e-shab ke havāle ho ga.e

maiñ ne jab chāhā ki hoñ sairāb dil kī hasrateñ

saare lamhe zindagī ke ḳhushk pyāle ho ga.e

buġhz-o-nafrat ke dhuveñ se ghuT rahe the sab ke dam

jal ga.iiñ jab pyaar kī sham.eñ ujāle ho ga.e

hasratoñ ko manzileñ mil jaa.eñ mumkin hī nahīñ

ḳhvāhishoñ ke rāste ab aur kaale ho ga.e

ab kahīñ aisā na ho nāsūr ban jaa.eñ ye sab

dil pe jitne bhī nishāñ the vo to chhāle ho ga.e

mujh ko maidān-e-musībat meñ akelā dekh kar

mujh se aage merī himmat ke risāle ho ga.e

saañp kī mānind ye bhī ek din Das jā.egā

chashm-e-hasrat meñ bahut din ḳhvāb paale ho ga.e

ek koshish aur kar ke dekhte 'shārib'-miyāñ

ab bahut din aap ko kīchaḌ uchhāle ho ga.e

parda-e-ruKH kya uTha har-su ujale ho gae

sab andhere daman-e-shab ke hawale ho gae

main ne jab chaha ki hon sairab dil ki hasraten

sare lamhe zindagi ke KHushk pyale ho gae

bughz-o-nafrat ke dhuwen se ghuT rahe the sab ke dam

jal gain jab pyar ki shamen ujale ho gae

hasraton ko manzilen mil jaen mumkin hi nahin

KHwahishon ke raste ab aur kale ho gae

ab kahin aisa na ho nasur ban jaen ye sab

dil pe jitne bhi nishan the wo to chhaale ho gae

mujh ko maidan-e-musibat mein akela dekh kar

mujh se aage meri himmat ke risale ho gae

sanp ki manind ye bhi ek din Das jaega

chashm-e-hasrat mein bahut din KHwab pale ho gae

ek koshish aur kar ke dekhte 'shaarib'-miyan

ab bahut din aap ko kichaD uchhaale ho gae