parda-e-zulmat-e-shab mein jo sahar dekhte hain

parda-e-zulmat-e-shab meñ jo sahar dekhte haiñ

dīda-var haiñ vo pas-e-hadd-e-nazar dekhte haiñ

tere aane kī ḳhabar garm huī hai jab se

ham shab-o-roz tirī rāhguzar dekhte haiñ

dil bhī dil-sāz kī mānind anā-parvar hai

aa.ine par asar-e-ā.ina-gar dekhte haiñ

lag ga.e mujh meñ bhalā kaun se surḳhāb ke par

log kyoñ mujh ko ba-andāz-e-digar dekhte haiñ

vo to lauT aa.e sitāroñ kī jabīneñ chhū kar

aur ham log abhī bāzū-o-par dekhte haiñ

jaane kyā DhūñDne lagtī haiñ hamārī āñkheñ

jab bhī ham ahd-e-guzishta ke khañDar dekhte haiñ

na qabīla na tashaḳhḳhus na liyāqat na sanad

sāhib-e-fikr-o-nazar fikr-o-nazar dekhte haiñ

fan har ik jubba-o-dastār se bālā-tar hai

qadr-dāñ barsar-e-ijlās hunar dekhte haiñ

ye koī ḳhvāb hai yā apnī nigāhoñ kā fareb

kabhī rahbar ko kabhī aap kā ghar dekhte haiñ

parda-e-zulmat-e-shab mein jo sahar dekhte hain

dida-war hain wo pas-e-hadd-e-nazar dekhte hain

tere aane ki KHabar garm hui hai jab se

hum shab-o-roz teri rahguzar dekhte hain

dil bhi dil-saz ki manind ana-parwar hai

aaine par asar-e-aina-gar dekhte hain

lag gae mujh mein bhala kaun se surKHab ke par

log kyon mujh ko ba-andaz-e-digar dekhte hain

wo to lauT aae sitaron ki jabinen chhu kar

aur hum log abhi bazu-o-par dekhte hain

jaane kya DhunDne lagti hain hamari aankhen

jab bhi hum ahd-e-guzishta ke khanDar dekhte hain

na qabila na tashaKHKHus na liyaqat na sanad

sahib-e-fikr-o-nazar fikr-o-nazar dekhte hain

fan har ek jubba-o-dastar se baala-tar hai

qadr-dan barsar-e-ijlas hunar dekhte hain

ye koi KHwab hai ya apni nigahon ka fareb

kabhi rahbar ko kabhi aap ka ghar dekhte hain