parda uTha kar ruKH ko ayan us shoKH ne jis hangam kiya

parda uThā kar ruḳh ko ayaañ us shoḳh ne jis hañgām kiyā

ham to rahe mashġhūl udhar yaañ ishq ne dil kā kaam kiyā

aa ga.e jab sayyād ke bas meñ soch kiye phir hāsil kyā

ab to usī kī Thahrī marzī jin ne asīr-e-dām kiyā

chashm ne chhīnā palkoñ ne chedā zulf ne bāñdhā dil ko aah

abrū ne aisī teġh jaḌī jo qissa hī sab itmām kiyā

saḳht ḳhajil haiñ aur sharminda rah rah kar pachtāte haiñ

ḳhvāb meñ us se raat laḌe ham kyā hī ḳhayāl-e-ḳhām kiyā

chhoḌ diyā jab ham ne sanam ke kūche meñ āne-jāne ko

phir to udhar is shoḳh ne ham se shikva bharā paiġhām kiyā

aur idhar se chāhat bhī yuuñ hañs kar bolī vaah jī vaah

uThiye chaliye yaar se miliye ab to bahut ārām kiyā

yaar kī mai-gūñ chashm ne apnī ek nigah se ham ko 'nazīr'

mast kiyā aubāsh banāyā rind kiyā badnām kiyā

parda uTha kar ruKH ko ayan us shoKH ne jis hangam kiya

hum to rahe mashghul udhar yan ishq ne dil ka kaam kiya

aa gae jab sayyaad ke bas mein soch kiye phir hasil kya

ab to usi ki Thahri marzi jin ne asir-e-dam kiya

chashm ne chhina palkon ne cheda zulf ne bandha dil ko aah

abru ne aisi tegh jaDi jo qissa hi sab itmam kiya

saKHt KHajil hain aur sharminda rah rah kar pachtate hain

KHwab mein us se raat laDe hum kya hi KHayal-e-KHam kiya

chhoD diya jab hum ne sanam ke kuche mein aane-jaane ko

phir to udhar is shoKH ne hum se shikwa bhara paigham kiya

aur idhar se chahat bhi yun hans kar boli wah ji wah

uThiye chaliye yar se miliye ab to bahut aaram kiya

yar ki mai-gun chashm ne apni ek nigah se hum ko 'nazir'

mast kiya aubash banaya rind kiya badnam kiya