parda uTha ke mehr ko ruKH ki jhalak dikha ki yun

parda uThā ke mehr ko ruḳh kī jhalak dikhā ki yuuñ

baaġh meñ jā ke sarv ko qad kī lachak dikhā ki yuuñ

ātish-e-gul chaman ke biich jab hama sū ho shola-zan

apne libās-e-surḳh kī us ko bhaḌak dikhā ki yuuñ

jo koī pūchhe jān-e-man shoḳhī o jalva kis tarah

lama-e-barq kī tarah ek jhamak dikhā ki yuuñ

shīshe ke biich duḳht-e-raz kartī hai shoḳh-chashmiyāñ

tū bhī Tuk apnī chashm kī us ko bhaḌak dikhā ki yuuñ

nazreñ milāve gar koī tujh se kabhī to jān-e-man

us ke ta.iiñ tū duur se āñkheñ tanik dikhā ki yuuñ

kabk o tadrau gar kareñ aage tire ḳhirām-e-nāz

apne ḳhirām-e-nāz kī un ko laTak dikhā ki yuuñ

rātoñ ko tujh se jāgnā gar koī pūchhe 'mus.hafī'

chasm-e-sitāra baaz haiñ us ko falak dikhā ki yuuñ

parda uTha ke mehr ko ruKH ki jhalak dikha ki yun

bagh mein ja ke sarw ko qad ki lachak dikha ki yun

aatish-e-gul chaman ke bich jab hama su ho shola-zan

apne libas-e-surKH ki us ko bhaDak dikha ki yun

jo koi puchhe jaan-e-man shoKHi o jalwa kis tarah

lama-e-barq ki tarah ek jhamak dikha ki yun

shishe ke bich duKHt-e-raz karti hai shoKH-chashmiyan

tu bhi Tuk apni chashm ki us ko bhaDak dikha ki yun

nazren milawe gar koi tujh se kabhi to jaan-e-man

us ke tain tu dur se aankhen tanik dikha ki yun

kabk o tadrau gar karen aage tere KHiram-e-naz

apne KHiram-e-naz ki un ko laTak dikha ki yun

raaton ko tujh se jagna gar koi puchhe 'mushafi'

chasm-e-sitara baz hain us ko falak dikha ki yun