pareshan hain KHirad-mandon ki hairani nahin jati

pareshāñ haiñ ḳhirad-mandoñ kī hairānī nahīñ jaatī

miTā.ī aql se tahrīr-e-peshānī nahīñ jaatī

bhulātā huuñ unheñ jitnā vo utne yaad aate haiñ

ḳhalish zaḳhm-e-mohabbat kī ba-āsānī nahīñ jaatī

agar ho shīsha-e-dil saaf to dam-bhar meñ khul jaa.e

haqīqat kyoñ ḳhudā-e-pāk kī jaanī nahīñ jaatī

muqaddar meñ jo likkhā hai vo badlā hai na badlegā

ḳhudā.ī hukm meñ hujjat koī maanī nahīñ jaatī

kisī kā jalva-e-rangīñ kahīñ ik baar dekhā thā

magar ab tak nigāhoñ kī vo hairānī nahīñ jaatī

havas dīdār kī dil se jo nikle bhī to kyā nikle

bahār-e-husn kī jab jalva-sāmānī nahīñ jaatī

hayāt-e-chand-roza ke tamāshoñ meñ haiñ ġham aise

hamāre dil se hirs-e-ālam-e-fānī nahīñ jaatī

hamārī zindagī hai ik bahār-e-be-ḳhizāñ 'āqil'

hamāre tā.ir-e-dil kī ġhazal-ḳhvānī nahīñ jaatī

pareshan hain KHirad-mandon ki hairani nahin jati

miTai aql se tahrir-e-peshani nahin jati

bhulata hun unhen jitna wo utne yaad aate hain

KHalish zaKHm-e-mohabbat ki ba-asani nahin jati

agar ho shisha-e-dil saf to dam-bhar mein khul jae

haqiqat kyon KHuda-e-pak ki jaani nahin jati

muqaddar mein jo likkha hai wo badla hai na badlega

KHudai hukm mein hujjat koi mani nahin jati

kisi ka jalwa-e-rangin kahin ek bar dekha tha

magar ab tak nigahon ki wo hairani nahin jati

hawas didar ki dil se jo nikle bhi to kya nikle

bahaar-e-husn ki jab jalwa-samani nahin jati

hayat-e-chand-roza ke tamashon mein hain gham aise

hamare dil se hirs-e-alam-e-fani nahin jati

hamari zindagi hai ek bahaar-e-be-KHizan 'aqil'

hamare tair-e-dil ki ghazal-KHwani nahin jati