pareshan is tarah hone se kya hoga

pareshāñ is tarah hone se kyā hogā

vahī hogā jo manzūr-e-ḳhudā hogā

kabhī sochā nahīñ maiñ ne mohabbat meñ

vo mujh se ruuTh kar aise ḳhafā hogā

nahīñ koī shikāyat hai mujhe us se

shab-e-furqat meñ vo bhī to jalā hogā

chaloge kab talak tum un ke kāñdhoñ par

bhalā kyā ḳhaak tum ko tajraba hogā

bahut hī mushtarak the dard donoñ ke

yaqīnan āshiqī kā mas.ala hogā

ḳhud apne zehn kī gahrā.iyoñ meñ gum

kisī kambal meñ vo lipTā paḌā hogā

saḌak pe raushnī kī dauḌ jaarī hai

añdherā aage aage bhāgtā hogā

mire atrāf kī ḳhalvat meñ tanhā vo

mujhe shiddat se 'anvar' DhūñDhtā hogā

pareshan is tarah hone se kya hoga

wahi hoga jo manzur-e-KHuda hoga

kabhi socha nahin main ne mohabbat mein

wo mujh se ruTh kar aise KHafa hoga

nahin koi shikayat hai mujhe us se

shab-e-furqat mein wo bhi to jala hoga

chaloge kab talak tum un ke kandhon par

bhala kya KHak tum ko tajraba hoga

bahut hi mushtarak the dard donon ke

yaqinan aashiqi ka masala hoga

KHud apne zehn ki gahraiyon mein gum

kisi kambal mein wo lipTa paDa hoga

saDak pe raushni ki dauD jari hai

andhera aage aage bhagta hoga

mere atraf ki KHalwat mein tanha wo

mujhe shiddat se 'anwar' DhunDhta hoga