pareshani nahin jati ki hairani nahin jati

pareshānī nahīñ jaatī ki hairānī nahīñ jaatī

nahīñ jaatī to haañ tahrīr-e-peshānī nahīñ jaatī

na ho iḳhlās jis meñ nazr vo maanī nahīñ jaatī

mohabbat kī kabhī bekār qurbānī nahīñ jaatī

mire hisse meñ to aa.ī nahīñ jam.īyat-e-ḳhātir

tirī zulfoñ kī āḳhir kyoñ pareshānī nahīñ jaatī

agar tum sāmne aao to kyā barpā qayāmat ho

ki is parde pe bhī jalvoñ kī tābānī nahīñ jaatī

junūñ-mashrab bayābāñ meñ raheñ yā baaġh meñ lekin

ba-rang-e-gul kahīñ bhī chāk-dāmānī nahīñ jaatī

tumhārī baat to hai aur lekin ham ġharīboñ ko

jo mushkil pesh aatī hai ba-āsānī nahīñ jaatī

rahī haiñ jin se bāteñ muddatoñ ḳhalvat meñ jalvat meñ

ab un se bhī mirī āvāz pahchānī nahīñ jaatī

masā.ib kī ghaTāoñ meñ nahīñ bujhte mire tevar

savād-e-zulm meñ chehra kī tābānī nahīñ jaatī

nigāh-e-mehr un kī laakh pardā-posh ho 'vāsif'

gunahgār-e-mohabbat kī pashemānī nahīñ jaatī

pareshani nahin jati ki hairani nahin jati

nahin jati to han tahrir-e-peshani nahin jati

na ho iKHlas jis mein nazr wo mani nahin jati

mohabbat ki kabhi bekar qurbani nahin jati

mere hisse mein to aai nahin jamiyat-e-KHatir

teri zulfon ki aaKHir kyon pareshani nahin jati

agar tum samne aao to kya barpa qayamat ho

ki is parde pe bhi jalwon ki tabani nahin jati

junun-mashrab bayaban mein rahen ya bagh mein lekin

ba-rang-e-gul kahin bhi chaak-damani nahin jati

tumhaari baat to hai aur lekin hum gharibon ko

jo mushkil pesh aati hai ba-asani nahin jati

rahi hain jin se baaten muddaton KHalwat mein jalwat mein

ab un se bhi meri aawaz pahchani nahin jati

masaib ki ghaTaon mein nahin bujhte mere tewar

sawad-e-zulm mein chehra ki tabani nahin jati

nigah-e-mehr un ki lakh parda-posh ho 'wasif'

gunahgar-e-mohabbat ki pashemani nahin jati