parinde ja chuke hain kab ke ghonslon ko bhi

parinde jā chuke haiñ kab ke ghoñsloñ ko bhī

batā.e rasta koī ham musāfiroñ ko bhī

maiñ jāntā huuñ ki ik din hameñ bichhaḌnā hai

sambhāl rakkhā jabhī to hai āñ.suoñ ko bhī

abhī to duur hai manzil ki kāTnī haiñ abhī

milī jo virse meñ haiñ un masāfatoñ ko bhī

kahāñ vo vaqt havāoñ pe hukm chaltā thā

aur ab ye haal taraste haiñ āhaToñ ko bhī

ajab haiñ ham ki banānā makān kachchā hī

aur ehtimām se ghar laanā bārishoñ ko bhī

sabhī lage haiñ jo paivand karne shāḳhoñ ko

kisī ne dekhā hai dīmak-zada jaḌoñ ko bhī

parinde ja chuke hain kab ke ghonslon ko bhi

batae rasta koi hum musafiron ko bhi

main jaanta hun ki ek din hamein bichhaDna hai

sambhaal rakkha jabhi to hai aansuon ko bhi

abhi to dur hai manzil ki kaTni hain abhi

mili jo wirse mein hain un masafaton ko bhi

kahan wo waqt hawaon pe hukm chalta tha

aur ab ye haal taraste hain aahaTon ko bhi

ajab hain hum ki banana makan kachcha hi

aur ehtimam se ghar lana barishon ko bhi

sabhi lage hain jo paiwand karne shaKHon ko

kisi ne dekha hai dimak-zada jaDon ko bhi