pas-e-gardun kisi ne nam bola tha hamara

pas-e-gardūñ kisī ne naam bolā thā hamārā

badan kī qaid se haa.e rihā honā hamārā

yuuñ ḳhud ko chhoḌ kar nikle kisī kī justujū meñ

hamīñ ne umr-bhar phir rāsta dekhā hamārā

kisī kā aks ham par rah gayā yā aa.ine par

ki apne-āp se chehra nahīñ miltā hamārā

baḌī muddat se is kī dhuup jhele jā rahe haiñ

paḌegā shams par bhī ek din saaya hamārā

taḌaptī hai sisaktī hai yahāñ rah kar musalsal

ye kis kī ruuh hai jis ne badan pahnā hamārā

nishāne par dil-e-majrūh āḳhir kyuuñ hamesha

sitamgar kyā tujhe ye sar nahīñ dikhtā hamārā

banā ke rāz-e-dil har haal meñ vo shaḳhs ham ko

rakhegā yaad par charchā nahīñ hogā hamārā

pas-e-gardun kisi ne nam bola tha hamara

badan ki qaid se hae riha hona hamara

yun KHud ko chhoD kar nikle kisi ki justuju mein

hamin ne umr-bhar phir rasta dekha hamara

kisi ka aks hum par rah gaya ya aaine par

ki apne-ap se chehra nahin milta hamara

baDi muddat se is ki dhup jhele ja rahe hain

paDega shams par bhi ek din saya hamara

taDapti hai sisakti hai yahan rah kar musalsal

ye kis ki ruh hai jis ne badan pahna hamara

nishane par dil-e-majruh aaKHir kyun hamesha

sitamgar kya tujhe ye sar nahin dikhta hamara

bana ke raaz-e-dil har haal mein wo shaKHs hum ko

rakhega yaad par charcha nahin hoga hamara