pas-e-qafila jo ghubar tha koi usMein naqa-sawar tha

pas-e-qāfila jo ġhubār thā koī us meñ nāqa-savār thā

abhī gard-bād ho uḌ gayā vo ajab tarah kā ġhubār thā

maiñ nigāh-e-pāk se dekhe thā tire husn-e-pāk ko us pe bhī

mire jī meñ ḳhvāhish-e-vasl thī mire dil meñ bos-o-kanār thā

dil-e-ḳhasta pahlū meñ rah gayā mire sard ho ke to kyā ajab

ki kisī kī sāfī-e-shast kā ye ḳhadañg-ḳhurda shikār thā

mirī be-kasī pe tirī nazar na paḌī jab ai but-e-ishva-gar

vo jo terā ahd-e-shabāb thā so vo ain josh-e-bahār thā

maiñ mazār ko bhī miTā diyā maiñ ġhubār ko bhī uḌā diyā

ki tirī safā-e-mizāj par mirī ḳhaak se bhī ġhubār thā

is adā se tiir lagāve thā tū ba-rū-e-tūda-e-musht-e-gul

ki falak ba-teġh-o-kamān bhī tirā mahv-e-kund-o-kadār thā

ye junūñ kī uqda-kushā.iyāñ koī bhūltā huuñ maiñ 'mus.hafī'

ki ba-rū-e-har-sar-e-ābla vahī nāḳhun-e-sar-e-ḳhār thā

pas-e-qafila jo ghubar tha koi us mein naqa-sawar tha

abhi gard-baad ho uD gaya wo ajab tarah ka ghubar tha

main nigah-e-pak se dekhe tha tere husn-e-pak ko us pe bhi

mere ji mein KHwahish-e-wasl thi mere dil mein bos-o-kanar tha

dil-e-KHasta pahlu mein rah gaya mere sard ho ke to kya ajab

ki kisi ki safi-e-shast ka ye KHadang-KHurda shikar tha

meri be-kasi pe teri nazar na paDi jab ai but-e-ishwa-gar

wo jo tera ahd-e-shabab tha so wo ain josh-e-bahaar tha

main mazar ko bhi miTa diya main ghubar ko bhi uDa diya

ki teri safa-e-mizaj par meri KHak se bhi ghubar tha

is ada se tir lagawe tha tu ba-ru-e-tuda-e-musht-e-gul

ki falak ba-tegh-o-kaman bhi tera mahw-e-kund-o-kadar tha

ye junun ki uqda-kushaiyan koi bhulta hun main 'mushafi'

ki ba-ru-e-har-sar-e-abla wahi naKHun-e-sar-e-KHar tha