pasina mathe se bah raha hai na koi silwaT libas par hai

pasīna māthe se bah rahā hai na koī silvaT libās par hai

ajab thakan hai jo kaam karne se qabl taarī havās par hai

safed rut meñ gulāb hāthoñ se saat rañgoñ ke ḳhvāb chuntī

kapās chunñe ko aa.ī laḌkī kā dhyān thoḌī kapās par hai

samundaroñ ke musāfiro kuchh izāfī paanī bhī saath rakhnā

ki ik jazīra baḌī hī muddat se chand qatroñ kī aas par hai

mirī mohabbat ubalte alfāz kī na muhtāj hai na hogī

ye ThanDā paanī gilās meñ hai magar pasīna gilās par hai

badan kā har ek uzv dil kā kiyā-karāyā bhugat rahā hai

is ik student kī ḳhatā kā itaab saarī class par hai

pasina mathe se bah raha hai na koi silwaT libas par hai

ajab thakan hai jo kaam karne se qabl tari hawas par hai

safed rut mein gulab hathon se sat rangon ke KHwab chunti

kapas chunne ko aai laDki ka dhyan thoDi kapas par hai

samundaron ke musafiro kuchh izafi pani bhi sath rakhna

ki ek jazira baDi hi muddat se chand qatron ki aas par hai

meri mohabbat ubalte alfaz ki na muhtaj hai na hogi

ye ThanDa pani gilas mein hai magar pasina gilas par hai

badan ka har ek uzw dil ka kiya-karaya bhugat raha hai

is ek student ki KHata ka itab sari class par hai