patthar bhi dastaras mein hai shisha bhi dastyab
patthar bhī dastaras meñ hai shīsha bhī dastyāb
bikhre na jis kā 'aks vo chehra bhī dastyāb
maujūd hai hamāre yahāñ har tarah kā zaḳhm
gahrā bhī dastyāb hai taaza bhī dastyāb
jitnā tumhārā zarf hai mil jā.ūñgā tumheñ
dariyā bhī merā ruup hai qatra bhī dastyāb
maiñ bhī thakan se chuur thā lambe safar ke baa'd
us ke sarā-e-dil meñ thā kamra bhī dastyāb
ham ko bhī shauq thā ki chuneñ rāsta kaThin
aur thā muḳhālifat ko zamāna bhī dastyāb
sākin huā jo 'ilm ke is shahr meñ use
hogā na ik sukūn kā lamha bhī dastyāb
'sayyad' mazīd kitnī suhūlat tujhe mile
koh-e-girāñ hai sāmne tesha bhī dastyāb
patthar bhi dastaras mein hai shisha bhi dastyab
bikhre na jis ka 'aks wo chehra bhi dastyab
maujud hai hamare yahan har tarah ka zaKHm
gahra bhi dastyab hai taza bhi dastyab
jitna tumhaara zarf hai mil jaunga tumhein
dariya bhi mera rup hai qatra bhi dastyab
main bhi thakan se chur tha lambe safar ke ba'd
us ke sara-e-dil mein tha kamra bhi dastyab
hum ko bhi shauq tha ki chunen rasta kaThin
aur tha muKHalifat ko zamana bhi dastyab
sakin hua jo 'ilm ke is shahr mein use
hoga na ek sukun ka lamha bhi dastyab
'sayyad' mazid kitni suhulat tujhe mile
koh-e-giran hai samne tesha bhi dastyab
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
