patthar tamam shahr sitamgar ke ho gae

patthar tamām shahr sitamgar ke ho ga.e

jitne the aa.ine vo mire ghar ke ho ga.e

shāyad ki ye zamāna unheñ pūjne lage

kuchh log is ḳhayāl se patthar ke ho ga.e

mehvar se un ko khīñch na paa.ī koī kashish

shauq-e-tavāf meñ jo tire dar ke ho ga.e

vo apne lā shu.ūr se hijrat na kar sakā

mere irāde saat samundar ke ho ga.e

saffāk mausamoñ ne ajab sāzisheñ rachīñ

TukḌe havā ke hāthoñ gul-e-tar ke ho ga.e

merī bulandiyoñ pe thī jin kī nazar 'suḳhan'

maiñ ḳhush huuñ vo mere barābar ke ho ga.e

patthar tamam shahr sitamgar ke ho gae

jitne the aaine wo mere ghar ke ho gae

shayad ki ye zamana unhen pujne lage

kuchh log is KHayal se patthar ke ho gae

mehwar se un ko khinch na pai koi kashish

shauq-e-tawaf mein jo tere dar ke ho gae

wo apne la shuur se hijrat na kar saka

mere irade sat samundar ke ho gae

saffak mausamon ne ajab sazishen rachin

TukDe hawa ke hathon gul-e-tar ke ho gae

meri bulandiyon pe thi jin ki nazar 'suKHan'

main KHush hun wo mere barabar ke ho gae