pech-dar-pech sawalat mein uljhe hue hain

pech-dar-pech savālāt meñ uljhe hue haiñ

ham ajab sūrat-e-hālāt meñ uljhe hue haiñ

ḳhatm hone kā nahīñ mārka-e-ishq-o-havas

mas.ale saare mafādāt meñ uljhe hue haiñ

kis ḳhasāre meñ nazar hai ki simaT jaatī hai

kuchh abhī dā.era-e-zāt meñ uljhe hue haiñ

in meñ to mujh se ziyāda hai pareshāñ-nazarī

aa.ine shahr-e-kamālāt meñ uljhe hue haiñ

is pe dā'vā bhī ki ye kār-e-masīhā.ī hai

saare az.hān ḳhurāfāt meñ uljhe hue haiñ

kurra-e-ḳhāk pe paḌte hī nahīñ un ke qadam

dīda-var sair-e-tilismāt meñ uljhe hue haiñ

nūr-e-mutlaq kī hai tashbīh na tamsīl magar

ham ishārāt o kināyāt meñ uljhe hue haiñ

pech-dar-pech sawalat mein uljhe hue hain

hum ajab surat-e-haalat mein uljhe hue hain

KHatm hone ka nahin marka-e-ishq-o-hawas

masale sare mafadat mein uljhe hue hain

kis KHasare mein nazar hai ki simaT jati hai

kuchh abhi daera-e-zat mein uljhe hue hain

in mein to mujh se ziyaada hai pareshan-nazari

aaine shahr-e-kamalat mein uljhe hue hain

is pe da'wa bhi ki ye kar-e-masihai hai

sare azhan KHurafat mein uljhe hue hain

kurra-e-KHak pe paDte hi nahin un ke qadam

dida-war sair-e-tilismat mein uljhe hue hain

nur-e-mutlaq ki hai tashbih na tamsil magar

hum ishaaraat o kinayat mein uljhe hue hain