pesh-e-āshiq chashm-e-giryān-o-lab-e-ḳhandāñ hai ek
jal gayā jo naḳhl us ko barq aur bārāñ hai ek
dekhne detā nahīñ us ko hijāb-e-ishq haa.e
huuñ maiñ vo mahrūm jis ko vasl aur hijrāñ hai ek
nā-tavānī se tire bīmār ke ruḳhsār par
sailī-e-dast-e-sitam aur sāya-e-mizhgāñ hai ek
pairahan meñ yuuñ badan hai jis tarah se tan meñ ruuh
chashm-e-bad duur ab latāfat meñ vo jism-o-jāñ hai ek
maah se tashbīh phir tujh ko na kyuuñ kar dījiye
chāñdnī aur saaya terā ai mah-e-tābāñ hai ek
aap se behtar kī aage ḳhud-numā.ī hai zubūñ
rū-ba-rū-e-mehr māh-o-abr-e-be-bārāñ hai ek
chāhiye hañs kar chhīḌaknā ai lab-e-jānāñ namak
ātish-e-ġham se kabāb aur ye dil-e-sozāñ hai ek
āshiqoñ ke aage mushrik ai but-e-yaktā huuñ maiñ
gar kahūñ maiñ husn meñ tū aur mah-e-kan.āñ hai ek
saikḌoñ tūtī-zabāñ haiñ yaañ asīr-e-dām-e-ġham
ḳhāna-e-sayyād aur ye gumbad-e-gardāñ hai ek
ek hī ye nuur hai dil meñ har ik ke jalva-gar
shīshe haiñ lākhoñ parī sab meñ vale pinhāñ hai ek
pesh-e-ashiq chashm-e-giryan-o-lab-e-KHandan hai ek
jal gaya jo naKHl us ko barq aur baran hai ek
dekhne deta nahin us ko hijab-e-ishq hae
hun main wo mahrum jis ko wasl aur hijran hai ek
na-tawani se tere bimar ke ruKHsar par
saili-e-dast-e-sitam aur saya-e-mizhgan hai ek
pairahan mein yun badan hai jis tarah se tan mein ruh
chashm-e-bad dur ab latafat mein wo jism-o-jaan hai ek
mah se tashbih phir tujh ko na kyun kar dijiye
chandni aur saya tera ai mah-e-taban hai ek
aap se behtar ki aage KHud-numai hai zubun
ru-ba-ru-e-mehr mah-o-abr-e-be-baran hai ek
chahiye hans kar chhiDakna ai lab-e-jaanan namak
aatish-e-gham se kabab aur ye dil-e-sozan hai ek
aashiqon ke aage mushrik ai but-e-yakta hun main
gar kahun main husn mein tu aur mah-e-kanan hai ek
saikDon tuti-zaban hain yan asir-e-dam-e-gham
KHana-e-sayyaad aur ye gumbad-e-gardan hai ek
ek hi ye nur hai dil mein har ek ke jalwa-gar
shishe hain lakhon pari sab mein wale pinhan hai ek
Source:
Daftar-e-Fasahat (Pg. ebook-120 page-104)
-
Author:
Khwaja Mohammad Wazir
-
- Edition: 1847
- Publisher: Matba Mustafai, Lucknow
- Year of Publication: 1847
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.