phenki kisi ne kankari dil yak-ba-yak dariya hua

pheñkī kisī ne kañkarī dil yak-ba-yak dariyā huā

dariyā meñ ik sailāb thā sailāb thā umDā huā

dil meñ koī āzār thā vo mujh se yuuñ goyā huā

āzurda-e-tāsīr huuñ dil de diyā achchhā huā

gaahe ba-rañg-e-mehrbāñ gaahe ḳhayāl-e-bad-gumāñ

vo bhī to āḳhir phuul hai kāñToñ meñ hai uljhā huā

is tarah chashm-e-nīm-vā ġhāfil bhī thī bedār bhī

jaise nasha ho raat kā yā sub.h kā taḌkā huā

lutf-e-nazar vo shai lagī jo jis qadar thī ajnabī

rasta na thā jaanā huā chehra na thā dekhā huā

ai ḳhātir-e-mehr-āshnā us ke talavvun par na jā

ye be-ruḳhī thī ik adā vo sarv thā sīdhā huā

vo ilm ho yā shā.irī vo faqr ho yā sarvarī

ham jis qadar jhukte ga.e qad aur bhī ūñchā huā

jañg-o-jadal ke vāste āḳhir baḌe kyuuñ aa ga.e

bāzīcha-e-atfāl thā jhagḌā koī jhagḌā huā

phenki kisi ne kankari dil yak-ba-yak dariya hua

dariya mein ek sailab tha sailab tha umDa hua

dil mein koi aazar tha wo mujh se yun goya hua

aazurda-e-tasir hun dil de diya achchha hua

gahe ba-rang-e-mehrban gahe KHayal-e-bad-guman

wo bhi to aaKHir phul hai kanTon mein hai uljha hua

is tarah chashm-e-nim-wa ghafil bhi thi bedar bhi

jaise nasha ho raat ka ya subh ka taDka hua

lutf-e-nazar wo shai lagi jo jis qadar thi ajnabi

rasta na tha jaana hua chehra na tha dekha hua

ai KHatir-e-mehr-ashna us ke talawwun par na ja

ye be-ruKHi thi ek ada wo sarw tha sidha hua

wo ilm ho ya shairi wo faqr ho ya sarwari

hum jis qadar jhukte gae qad aur bhi uncha hua

jang-o-jadal ke waste aaKHir baDe kyun aa gae

bazicha-e-atfal tha jhagDa koi jhagDa hua