phir aashna-e-lazzat-e-dard-e-jigar hain hum

phir āshnā-e-lazzat-e-dard-e-jigar haiñ ham

phir mahram-e-kashākash-e-har-ḳhair-o-shar haiñ ham

har saañs de rahī hai ḳhabar kā.enāt kī

phir bāda-e-jamāl se yuuñ be-ḳhabar haiñ ham

phir ishq kī nazar meñ hai māshūqiyat kā naaz

phir husn-e-dil-navāz se shīr-o-shakar haiñ ham

jiine ke ishtiyāq se hai phir ramīdgī

phir sīna-e-hayāt meñ azm-e-safar haiñ ham

hoshyār-bāsh zulmat-e-ġham-ḳhāna-e-hayāt

phir markaz-e-tajalli-e-shams-o-qamar haiñ ham

kis zom meñ hai ai shab-e-daijūr-e-zindagī

phir rāzdār-e-nūr-e-tulū-e-sahar haiñ ham

hai kis ḳhayāl-e-ḳhām meñ ai ḳhārzār-e-dahr

phir kāmrān-e-ḳhanda-e-gul-hā-e-tar haiñ ham

phir zindagī hai ġham kī amānat liye hue

har daulat-e-nashāt se phir bahra-var haiñ ham

phir faiz-e-āshiqī se ba-īñ be-bazā.atī

jeb-e-jahāñ meñ daulat-e-lāl-o-guhar haiñ ham

phir bāvajūd-e-faqr vo hāsil hai tumtarāq

tū ye kahe ki sāhib-e-tāj-o-kamar haiñ ham

āñkhoñ meñ nūr-e-mus.haf-e-jānāñ liye hue

phir kardgār-e-ishq ke paiġhām-bar haiñ ham

khulte nahīñ haiñ 'josh' dimāġhoñ pe dil ke raaz

bālā-tar az rasā.i-e-naqd-o-nazar haiñ ham

phir aashna-e-lazzat-e-dard-e-jigar hain hum

phir mahram-e-kashakash-e-har-KHair-o-shar hain hum

har sans de rahi hai KHabar kaenat ki

phir baada-e-jamal se yun be-KHabar hain hum

phir ishq ki nazar mein hai mashuqiyat ka naz

phir husn-e-dil-nawaz se shir-o-shakar hain hum

jine ke ishtiyaq se hai phir ramidgi

phir sina-e-hayat mein azm-e-safar hain hum

hoshyar-bash zulmat-e-gham-KHana-e-hayat

phir markaz-e-tajalli-e-shams-o-qamar hain hum

kis zom mein hai ai shab-e-daijur-e-zindagi

phir raazdar-e-nur-e-tulu-e-sahar hain hum

hai kis KHayal-e-KHam mein ai KHarzar-e-dahr

phir kaamran-e-KHanda-e-gul-ha-e-tar hain hum

phir zindagi hai gham ki amanat liye hue

har daulat-e-nashat se phir bahra-war hain hum

phir faiz-e-ashiqi se ba-in be-bazaati

jeb-e-jahan mein daulat-e-lal-o-guhar hain hum

phir bawajud-e-faqr wo hasil hai tumtaraq

tu ye kahe ki sahib-e-taj-o-kamar hain hum

aankhon mein nur-e-mushaf-e-jaanan liye hue

phir kardgar-e-ishq ke paigham-bar hain hum

khulte nahin hain 'josh' dimaghon pe dil ke raaz

baala-tar az rasai-e-naqd-o-nazar hain hum