phir dekhte aish aadmi ka

phir dekhte aish aadmī kā

bantā jo falak mirī ḳhushī kā

gulshan meñ tire laboñ ne goyā

ras chuus liyā kalī kalī kā

terā bhī to husn hai daġhābāz

hotā hī nahīñ koī kisī kā

itnī hī to bas kasar hai tum meñ

kahnā nahīñ mānte kisī kā

ham bazm meñ un kī chupke baiThe

muñh dekhte haiñ har aadmī kā

tum kūcha-e-ġhair meñ na jaanā

us raah meñ hai guzar kisī kā

kis kis ne liye haiñ tere bose

hai la.al-e-namak-fishāñ jo phīkā

jo dam hai vo hai basā ġhanīmat

saara saudā hai jiite jī kā

āġhāz ko kaun pūchhtā hai

anjām achchhā ho aadmī kā

rokeñ unheñ kyā ki hai ġhanīmat

ānā-jānā kabhī kabhī kā

kahte haiñ use zabān-e-urdu

jis meñ na ho rang fārsī kā

aise se jo 'dāġh' ne nibāhī

sach hai ki ye kaam thā usī kā

phir dekhte aish aadmi ka

banta jo falak meri KHushi ka

gulshan mein tere labon ne goya

ras chus liya kali kali ka

tera bhi to husn hai daghabaz

hota hi nahin koi kisi ka

itni hi to bas kasar hai tum mein

kahna nahin mante kisi ka

hum bazm mein un ki chupke baiThe

munh dekhte hain har aadmi ka

tum kucha-e-ghair mein na jaana

us rah mein hai guzar kisi ka

kis kis ne liye hain tere bose

hai lal-e-namak-fishan jo phika

jo dam hai wo hai basa ghanimat

sara sauda hai jite ji ka

aaghaz ko kaun puchhta hai

anjam achchha ho aadmi ka

roken unhen kya ki hai ghanimat

aana-jaana kabhi kabhi ka

kahte hain use zaban-e-urdu

jis mein na ho rang farsi ka

aise se jo 'dagh' ne nibahi

sach hai ki ye kaam tha usi ka