phir hua waqt ki ho baal-kusha mauj-e-sharab

phir huā vaqt ki ho bāl-kushā mauj-e-sharāb

de bat-e-mai ko dil-o-dast-e-shanā mauj-e-sharāb

pūchh mat vaj.h-e-siyah-mastī-e-arbāb-e-chaman

sāya-e-tāk meñ hotī hai havā mauj-e-sharāb

jo huā ġharqa-e-mai baḳht-e-rasā rakhtā hai

sar se guzre pe bhī hai bāl-e-humā mauj-e-sharāb

hai ye barsāt vo mausam ki ajab kyā hai agar

mauj-e-hastī ko kare faiz-e-havā mauj-e-sharāb

chaar mauj uThtī hai tūfān-e-tarab se har sū

mauj-e-gul mauj-e-shafaq mauj-e-sabā mauj-e-sharāb

jis qadar rūh-e-nabātī hai jigar tishna-e-nāz

de hai taskīñ ba-dam-e-āb-e-baqā mauj-e-sharāb

bas-ki dauḌe hai rag-e-tāk meñ ḳhuuñ ho ho kar

shahpar-e-rañg se hai bāl-kushā mauj-e-sharāb

mauja-e-gul se charāġhāñ hai guzar-gāh-e-ḳhayāl

hai tasavvur meñ zi-bas jalva-numā mauj-e-sharāb

nashshe ke parde meñ hai mahv-e-tamāshā-e-dimāġh

bas-ki rakhtī hai sar-e-nash-o-numā mauj-e-sharāb

ek aalam pe haiñ tūfāni-e-kaifiyat-e-fasl

mauja-e-sabza-e-nau-ḳhez se tā mauj-e-sharāb

sharh-e-hañgāma-e-hastī hai zahe mausam-e-gul

rah-bar-e-qatrā-ba-dariyā hai ḳhoshā mauj-e-sharāb

hosh uḌte haiñ mire jalva-e-gul dekh 'asad'

phir huā vaqt ki ho bāl-kushā mauj-e-sharāb

phir hua waqt ki ho baal-kusha mauj-e-sharab

de bat-e-mai ko dil-o-dast-e-shana mauj-e-sharab

puchh mat wajh-e-siyah-masti-e-arbab-e-chaman

saya-e-tak mein hoti hai hawa mauj-e-sharab

jo hua gharqa-e-mai baKHt-e-rasa rakhta hai

sar se guzre pe bhi hai baal-e-huma mauj-e-sharab

hai ye barsat wo mausam ki ajab kya hai agar

mauj-e-hasti ko kare faiz-e-hawa mauj-e-sharab

chaar mauj uThti hai tufan-e-tarab se har su

mauj-e-gul mauj-e-shafaq mauj-e-saba mauj-e-sharab

jis qadar ruh-e-nabaati hai jigar tishna-e-naz

de hai taskin ba-dam-e-ab-e-baqa mauj-e-sharab

bas-ki dauDe hai rag-e-tak mein KHun ho ho kar

shahpar-e-rang se hai baal-kusha mauj-e-sharab

mauja-e-gul se charaghan hai guzar-gah-e-KHayal

hai tasawwur mein zi-bas jalwa-numa mauj-e-sharab

nashshe ke parde mein hai mahw-e-tamasha-e-dimagh

bas-ki rakhti hai sar-e-nash-o-numa mauj-e-sharab

ek aalam pe hain tufani-e-kaifiyat-e-fasl

mauja-e-sabza-e-nau-KHez se ta mauj-e-sharab

sharh-e-hangama-e-hasti hai zahe mausam-e-gul

rah-bar-e-qatra-ba-dariya hai KHosha mauj-e-sharab

hosh uDte hain mere jalwa-e-gul dekh 'asad'

phir hua waqt ki ho baal-kusha mauj-e-sharab