phir koi mahshar uThane meri tanhai mein aa

phir koī mahshar uThāne merī tanhā.ī meñ aa

apne hone kī ḳhabar le kar kabhī bastī meñ aa

dekhnā Thahrā to phir ik ye tamāshā bhī sahī

aag lagne kī ḳhabar sun kar hī ab khiḌkī meñ aa

ai mire hoñToñ kī lazzat shāḳh ko bojhal na kar

ik hilore meñ shajar se TuuT kar jholī meñ aa

jurm-e-be-lazzat hai sāhil par tirī tar-dāmanī

yā palaT ḳhushkī kī jānib yā khule paanī meñ aa

toḌ bhī de halqa-e-yārāñ bahut shab Dhal chukī

naql-e-zindānī ko ghar kī chār-dīvārī meñ aa

mere pairoñ meñ to zanjīreñ galī kūchoñ kī haiñ

mujh se milne shahr kī gunjān ābādī meñ aa

ḳhvāhish-e-be-ḳhānumāñ ko lā makān-e-harf meñ

nau-valad bachche kī sūrat paikar-e-ma.anī meñ aa

niiñd kuchh kar le ki taaza aañkh pe sūraj khule

sub.h sāhil par utarnā hai to is kashtī meñ aa

ḳhuun shiryānoñ kā āñkhoñ meñ dikhā.ī de sake

tū bhī dariyā hai agar 'shāhid' to tuġhyānī meñ aa

phir koi mahshar uThane meri tanhai mein aa

apne hone ki KHabar le kar kabhi basti mein aa

dekhna Thahra to phir ek ye tamasha bhi sahi

aag lagne ki KHabar sun kar hi ab khiDki mein aa

ai mere honTon ki lazzat shaKH ko bojhal na kar

ek hilore mein shajar se TuT kar jholi mein aa

jurm-e-be-lazzat hai sahil par teri tar-damani

ya palaT KHushki ki jaanib ya khule pani mein aa

toD bhi de halqa-e-yaran bahut shab Dhal chuki

naql-e-zindani ko ghar ki chaar-diwari mein aa

mere pairon mein to zanjiren gali kuchon ki hain

mujh se milne shahr ki gunjaan aabaadi mein aa

KHwahish-e-be-KHanuman ko la makan-e-harf mein

nau-walad bachche ki surat paikar-e-mani mein aa

nind kuchh kar le ki taza aankh pe suraj khule

subh sahil par utarna hai to is kashti mein aa

KHun shiryanon ka aankhon mein dikhai de sake

tu bhi dariya hai agar 'shahid' to tughyani mein aa