phir lauT ke is bazm mein aane ke nahin hain

phir lauT ke is bazm meñ aane ke nahīñ haiñ

ham log kisī aur zamāne ke nahīñ haiñ

ik duur kinārā hai vahīñ jā ke rukeñge

jitne bhī yahāñ ghar haiñ Thikāne ke nahīñ haiñ

yuuñ jāgte rahnā hai to āñkhoñ meñ hamārī

jo ḳhvāb chhupe haiñ nazar aane ke nahīñ haiñ

dil hai to ye daulat kabhī ma.adūm na hogī

ye dard kisī aur ḳhazāne ke nahīñ haiñ

kal raat ḳhamoshī ne ajab rañg dikhā.e

ye sher agar haiñ to sunāne ke nahīñ haiñ

har samt ujālā bhī hai sūraj bhī hai lekin

ham apne charāġhoñ ko bujhāne ke nahīñ haiñ

duniyā ne bhī kuchh ham ko bahut gher liyā hai

kuchh ham bhī use chhoḌ ke jaane ke nahīñ haiñ

phir lauT ke is bazm mein aane ke nahin hain

hum log kisi aur zamane ke nahin hain

ek dur kinara hai wahin ja ke rukenge

jitne bhi yahan ghar hain Thikane ke nahin hain

yun jagte rahna hai to aankhon mein hamari

jo KHwab chhupe hain nazar aane ke nahin hain

dil hai to ye daulat kabhi madum na hogi

ye dard kisi aur KHazane ke nahin hain

kal raat KHamoshi ne ajab rang dikhae

ye sher agar hain to sunane ke nahin hain

har samt ujala bhi hai suraj bhi hai lekin

hum apne charaghon ko bujhane ke nahin hain

duniya ne bhi kuchh hum ko bahut gher liya hai

kuchh hum bhi use chhoD ke jaane ke nahin hain