phir misr ke bazar mein nilam hua kyun

phir misr ke bāzār meñ nīlām huā kyuuñ

ai ishq batā terā ye anjām huā kyuuñ

ham bā.is-e-rāhat jise samjhe the vo lamha

ab apne liye bā.is-e-ālām huā kyuuñ

ai ishq falak par tujhe likhā jo ḳhudā ne

phir terā muqaddar bhalā ib.hām huā kyuuñ

ai ishq tirā naam hai jab sach kī alāmat

ai ishq tū rusvā yuuñ sar-e-ām huā kyuuñ

jab ek hī sajde meñ tirā bhed chhupā hai

phir sañg-e-malāmat hī tirā daam huā kyuuñ

ai aañkh tū be-ḳhvāb hai ḳhvāboñ kī talab meñ

ye hijr hī āḳhir tirā in.aam huā kyuuñ

chehre pe tire kis liye hairat hai abhī tak

ye itnī vazāhat pe bhī ib.hām huā kyuuñ

is dil ko hai mahbūb vahī dard kā naġhma

is dil meñ ta.ajjub hai ye kohrām huā kyuuñ

jo terī mohabbat ko samajh hī nahīñ paayā

'shāhīn' ye dil us ke bhalā naam huā kyuuñ

phir misr ke bazar mein nilam hua kyun

ai ishq bata tera ye anjam hua kyun

hum bais-e-rahat jise samjhe the wo lamha

ab apne liye bais-e-alam hua kyun

ai ishq falak par tujhe likha jo KHuda ne

phir tera muqaddar bhala ibham hua kyun

ai ishq tera nam hai jab sach ki alamat

ai ishq tu ruswa yun sar-e-am hua kyun

jab ek hi sajde mein tera bhed chhupa hai

phir sang-e-malamat hi tera dam hua kyun

ai aankh tu be-KHwab hai KHwabon ki talab mein

ye hijr hi aaKHir tera inam hua kyun

chehre pe tere kis liye hairat hai abhi tak

ye itni wazahat pe bhi ibham hua kyun

is dil ko hai mahbub wahi dard ka naghma

is dil mein tajjub hai ye kohram hua kyun

jo teri mohabbat ko samajh hi nahin paya

'shahin' ye dil us ke bhala nam hua kyun