phir sada-e-mohabbat suni hai abhi

phir sadā-e-mohabbat sunī hai abhī

zaḳhm-e-nau kī sa.ādat milī hai abhī

rābta dil kā dil se hai kaafī mujhe

nuur hī nuur meñ zindagī hai abhī

vaqt badlā hai ham tum to badle nahīñ

vo hī chāhat vahī bebasī hai abhī

ye jabīñ aur kisī dar pe jhuktī hī kyuuñ

us meñ terī mohabbat juḌī hai abhī

kuchh tamannā se baḌh kar bhī paayā magar

aarzū ek sab se baḌī hai abhī

aaj bhī zindagānī meñ jān-e-'safī'

aur sab kuchh hai terī kamī hai abhī

phir sada-e-mohabbat suni hai abhi

zaKHm-e-nau ki saadat mili hai abhi

rabta dil ka dil se hai kafi mujhe

nur hi nur mein zindagi hai abhi

waqt badla hai hum tum to badle nahin

wo hi chahat wahi bebasi hai abhi

ye jabin aur kisi dar pe jhukti hi kyun

us mein teri mohabbat juDi hai abhi

kuchh tamanna se baDh kar bhi paya magar

aarzu ek sab se baDi hai abhi

aaj bhi zindagani mein jaan-e-'safi'

aur sab kuchh hai teri kami hai abhi