phir shaitanon ki fitrat ne majbur kiya insanon ko

phir shaitānoñ kī fitrat ne majbūr kiyā insānoñ ko

phir insānoñ kī bastī se mahrūm kareñ shaitānoñ ko

kāshānoñ meñ rahne vaale ābād kareñ vīrānoñ ko

ye dīvāne haiñ dīvāne kyā kahte haiñ dīvānoñ ko

ilhād kī zulmat duur huī īmān kī sham'oñ se kah do

tajdīd-e-mohabbat bhī hogī āvāz to do parvānoñ ko

barbād tamannā.eñ luT-piT kar dil meñ aane vaalī haiñ

muhtāt raheñ dil vaale bhī taklīf na ho mehmānoñ ko

kaliyoñ pe javānī kā aanā āġhāz-e-qayāmat hotā hai

tauhīn-e-junūñ is mausam meñ manzūr nahīñ dīvānoñ ko

tā’rīf nahīñ fitrat is ko īmān kī quvvat kahtī hai

ik mard-e-mujāhid kā nā'ra taḌpā to gayā sultānoñ ko

dariyā meñ hamārī kashtī ko tūfān kā ḳhatra nā-mumkin

dar-asl bachāne vaale haiñ tūfānoñ se tūfānoñ ko

phir arsh-e-mu’allā se 'zaidī' talvār 'atā kī qudrat ne

duniyā maidān hamārā hai ye kaun kahe nā-dānoñ ko

phir shaitanon ki fitrat ne majbur kiya insanon ko

phir insanon ki basti se mahrum karen shaitanon ko

kashanon mein rahne wale aabaad karen viranon ko

ye diwane hain diwane kya kahte hain diwanon ko

ilhad ki zulmat dur hui iman ki sham'on se kah do

tajdid-e-mohabbat bhi hogi aawaz to do parwanon ko

barbaad tamannaen luT-piT kar dil mein aane wali hain

muhtat rahen dil wale bhi taklif na ho mehmanon ko

kaliyon pe jawani ka aana aaghaz-e-qayamat hota hai

tauhin-e-junun is mausam mein manzur nahin diwanon ko

ta’rif nahin fitrat is ko iman ki quwwat kahti hai

ek mard-e-mujahid ka na'ra taDpa to gaya sultanon ko

dariya mein hamari kashti ko tufan ka KHatra na-mumkin

dar-asl bachane wale hain tufanon se tufanon ko

phir arsh-e-mu’alla se 'zaidi' talwar 'ata ki qudrat ne

duniya maidan hamara hai ye kaun kahe na-danon ko