phir teri yaadon ki phunkaron ke bich

phir tirī yādoñ kī phunkāroñ ke biich

nīm-jāñ hai raat yalġhāroñ ke biich

ūñghtā rahtā hai aksar māhtāb

raat bhar ham chand be-dāroñ ke biich

gūñjtī rahtī hai mujh meñ dam-ba-dam

chīḳh jo ubhrī na kohsāroñ ke biich

dekhtā āḳhir maiñ us ko kis tarah

raushnī kī tez bauchhāroñ ke biich

kho hī jaatā huuñ tire qisse meñ maiñ

bārhā gumnām kirdāroñ ke biich

ek adnā sā diyā hai āftāb

mere man ke gahre añdhiyāroñ ke biich

qaid se apnī nikalte kyuuñ nahīñ

zaḳhm kab bharte haiñ dīvāroñ ke biich

sānehe chhapne lage haiñ āñkhoñ meñ

nabz tham jaa.e na aḳhbāroñ ke biich

thā mahāvaT aur phir juḌvāñ bahāv

bah gayā maiñ gungune dhāroñ ke biich

phir teri yaadon ki phunkaron ke bich

nim-jaan hai raat yalghaaron ke bich

unghta rahta hai aksar mahtab

raat bhar hum chand be-daron ke bich

gunjti rahti hai mujh mein dam-ba-dam

chiKH jo ubhri na kohsaron ke bich

dekhta aaKHir main us ko kis tarah

raushni ki tez bauchhaaron ke bich

kho hi jata hun tere qisse mein main

barha gumnam kirdaron ke bich

ek adna sa diya hai aaftab

mere man ke gahre andhiyaron ke bich

qaid se apni nikalte kyun nahin

zaKHm kab bharte hain diwaron ke bich

sanehe chhapne lage hain aankhon mein

nabz tham jae na aKHbaron ke bich

tha mahawaT aur phir juDwan bahaw

bah gaya main gungune dhaaron ke bich